Unha flor e un libro

17 Maio 2011

 
Fotografía da orquídea Dactylorhiza elataSegundo vai avanzando o ano, os distintos períodos de floración das especies silvestres marcan un ritmo de matices na paisaxe. Maio leva a fama de se-lo mes das flores, e hoxe, Día das Letras Galegas, queremos salientar unha flor moi literaria, a orquídea, e un libro que nos axudará a coñecelas.

As orquídeas galegas, a diferenza das tropicais, teñen flores pequenas, pero non menos vistosas cando as miramos de preto. Das cerca de 40 especies nativas, a maioría florece en torno a este mes. Amantes dos solos calcarios, onde atoparemos máis diversidade é no sur de Lugo e no nordeste ourensán. Pero na costa, debido a que as cunchas dos moluscos mariños crean condicións idóneas, tamén son frecuentes.

Fotografía da orquídea Dactylorhiza elataA Dactylorhiza elata é unha especie abondosa e facilmente localizable na nosa bisbarra. Agora mesmo podemos observala en flor na zona húmida transdunar da praia da Alameda (Ponte do Porco, Miño). Pero tamén gusta das praderías, coma as da ribeira da ría en Miodelo (Bergondo), e incluso das beiras dos camiños. Fotografía da orquídea Dactylorhiza elataO tallo desta orquídea pode chegar a ser grande, destacando pola súa fermosa cor que vai do rosa ó lila, características que a fan conspicua.

Como non é a única especie coa que podemos atoparnos, recomendamos a lectura da Guía das orquídeas de Galicia, dos biólogos Carlos Cortizo e Elvira Sahuquillo, publicada por Baía Edicións. Este pequeno libro, ademais de permitirnos identifica-las distintas especies grazas ás súas excelentes fotografías e fichas descritivas, tamén serve de perfecta introdución no apaixonante mundo das orquídeas.


Uso de cookies: Este sitio web emprega cookies para mellora-la experiencia de usuario. Se continúa navegando consente a aceptación de ditas cookies e acepta a nosa política de cookies (se pincha no enlace obterá máis información).