Futuros monitores aprenden de custodia

28 Febreiro 2015

 
Hoxe, dentro das xornadas lectivas do Curso de Monitor de Actividades de Tempo Libre que se está a impartir na Casa da Xuventude de Betanzos, os alumnos tiveron a oportunidade de descubrir en que consiste a custodia do territorio e de coñecer en detalle o noso traballo en favor da conservación da biodiversidade local.

Fragas do Mandeo impartiu unha charla e respondeu ás inquietudes dos dezaseis alumnos deste curso. Tras estudar diversas materias ―entre elas educación ambiental― nas 350 horas que ten de duración, estarán capacitados oficialmente para seren monitores de actividades de tempo libre.

A nosa mensaxe animounos a que no seu futuro profesional, cando se responsabilicen de campamentos, obradoiros e excursións por paraxes naturais, estimulen á cidadanía a implicarse directamente na conservación deses enclaves que se utilizan como espazos de lecer, pero que tamén son refuxio da nosa biodiversidade e nos provén de servizos ecosistémicos imprescindibles. ¡Debemos devolverlle á natureza os seus favores!

Agradecemos esta magnífica oportunidade de divulgar a nosa actividade á Escola de Tempo Libre Querqus e a Espazo Xove Betanzos.

Foto do curso


Uso de cookies: Este sitio web emprega cookies para mellora-la experiencia de usuario. Se continúa navegando consente a aceptación de ditas cookies e acepta a nosa política de cookies (se pincha no enlace obterá máis información).