Xornada de voluntariado o día 20 en Os Vellos

15 Agosto 2017

 
Este domingo día 20 imos achegarnos ó monte que mercamos en Os Vellos (Coirós), onde xa temos eliminados os eucaliptos para recupera-lo bosque autóctono. O obxectivo é eliminar o exceso de mato que dificulta o crecemento dos castiñeiros que plantamos e que tamén supón un risco en caso de incendio (o monte linda coa autovía). No caso de que dea tempo ou sexamos suficientes para formar dous grupos, tamén continuaremos coa eliminación do xunco Cyperus eragrostis na reserva de anfibios do Catorce.

É conveniente levar instrumentos de corte (gabillo ou podadeira) por se non chegan as nosas ferramentas; tamén é recomendable levar luvas e protectores para os xeonllos. Viste roupa axeitada para traballar no monte e non esquezas levar algo de picar e de beber para a pausa de media mañá.

Para apuntarte a esta xornada de voluntariado ambiental basta con enviarnos con antelación os teus datos (nome completo, DNI, data de nacemento e móbil). Así poderemos notificarche cambios de última hora, facerche un seguro de accidentes e facilitarasnos a organización. Na sección Contacto atoparás a información necesaria.

Punto de encontro: Centro de Saúde de Betanzos, onde compartiremos vehículos.
Data: Domingo, 20 de agosto de 2017.
Hora: Sairemos ás 9:30 e volveremos ás 14:00 horas.

Post data: As sete persoas que participaron na xornada de voluntariado foron quen de cortar todo o exceso de mato no noso monte de Os Vellos. Os castiñeiros, carballos, bidueiros e salgueiros que plantamos ou naceron espontaneamente teñen agora menos competencia. Nuns anos, a súa sombra será a que limite o crecemento do mato.

Foto dos voluntarios


Uso de cookies: Este sitio web emprega cookies para mellora-la experiencia de usuario. Se continúa navegando consente a aceptación de ditas cookies e acepta a nosa política de cookies (se pincha no enlace obterá máis información).