Esta fin de semana achegouse á praia da Abeleira (Paderne) un grupo de voluntariado xuvenil do Proxecto Lewo da Xunta de Galicia. O motivo era colaborar connosco eliminando especies exóticas invasoras na mañás de onte sábado e de hoxe domingo.
Os doce participantes, acompañados de dous monitores de Ribeirán e dun voluntario de Fragas do Mandeo, dedicaron o tempo a arrincar pacientemente a tradescantia que medra na linde da praia co monte. Finalmente recolleron 310 kg desta invasora e retiraron 33,5 kg de lixo atopado na zona de traballo.
A praia da Abeleira está integrada na Rede Natura, pois forma parte do espazo natural protexido ZEC Betanzos-Mandeo, razón pola que é moi importante mantela libre de especies exóticas invasoras. Esta fin de semana avanzouse nese obxectivo, pero aínda queda moito traballo para rematar de erradicala neste enclave. Calquera axuda, como a deste grupo de persoas, é benvida.
