Fragas do Mandeo

 
A pasada fin de semana, un dos nosos voluntarios percorreu as dúas ribeiras do río Mandeo dende O Tope até a ponte de Teixeiro. As fortes enchentes dos últimos dous meses lavaron as beiras do río, arrastrando as follas, arrincando vexetación e incluso erosionando severamente o solo. Ademais do lixo que trouxeron as enxurradas, depositado principalmente na liña da máxima crecida ou enganchado na vexetación no caso dos plásticos, apareceron vellos refugallos medio enterrados. Así deuse a coincidencia de que a localización do lixo era fácil e de que o tránsito non se vía entorpecido pola vexetación ribeirega.

Na súa camiñada de máis de 15 km, percorrida en varias etapas, retirou dúas rodas, un panel informativo esnaquizado e refugallos diversos, sobre todo pequenos plásticos moi desfeitos pola corrente. En total foron 143,5 kg de lixo, completando así a primeira recollida de lixo deste ano ó longo de todo o tramo que apadriñamos no río Mandeo.

Tamén revisou a reaparición de especies exóticas invasoras. Neste tramo temos eliminada toda a vexetación exótica de porte herbáceo e arbustivo, pero temos que seguir vixiando que non se produzan recolonizacións. Unicamente observou rebrotes no último foco eliminado o ano pasado, o que da a medida da eficacia dos nosos esforzos. Lamentablemente, tamén avistou un visón americano. Como a eliminación da fauna exótica está actualmente fóra das nosas capacidade, transmitimos esta información á Administración competente.

 
Rematado o ano 2019, é o momento de facer balance do conseguido. Non é difícil, pois estivemos levando unha detallada conta en tódalas xornadas de voluntariado. Vexamos un resumen dos resultados.

O lixo que recollemos no litoral e nos ríos pesou 8.417,5 kg. Na loita contra as especies exóticas invasoras, eliminamos focos de 21 especies distintas de plantas exóticas, ascendendo o peso total da biomasa retirada a 4.653 kg. As especies que precisaron máis dedicación foron a tradescantia, da que retiramos 2.920 kg, e a crocosmia, da que arrincamos 9.385 tubérculos.

As zonas de actuación nos ríos sumaron 43 km de ribeira no Mandeo, Mendo, Lambre e rego das Bouzas. No litoral actuamos na ría de Betanzos, na desembocadura do Lambre (marisma e praias da Alameda e da Abeleira) e na praia Grande de Miño (incluíndo o lado norte da súa marisma). Aparte destas zonas de dominio público que apadriñamos, obviamente tamén traballamos no mantemento das parcelas de monte que custodiamos (mediante adquisicións e convenios), entre elas as microrreservas que creamos no Ollo da Roda e no Catorce.

Todo isto foi posible grazas ó traballo das 114 persoas que participaron nunha ou varias das xornadas de voluntariado que convocamos, máis as 51 persoas remitidas pola Dirección Xeral de Xuventude e Voluntariado. A todos eles, ¡moitas grazas!

¡Feliz aninovo!