Fragas do Mandeo

 
Hoxe aparece unha boa noticia no Boletín Oficial do Estado: O goberno incrementa as deducións polas doazóns feitas a entidades que, como Fragas do Mandeo, están acollidas ó réxime fiscal de incentivos ó mecenado.

Até agora, a dedución do 80 % no IRPF soamente se aplicaba ás doazóns de até 150 euros; o próximo ano vai aplicarse ás doazóns de até 250 euros. Así unha persoa que nos doe 250 euros, recuperará na correspondente declaración da renda 200 euros.

No caso das empresas, a dedución no imposto de sociedades pasa de ser do 35 % a un 40 %; pero cando esa empresa foi mantendo ou incrementando esas doazóns dende dous anos antes, a dedución chega a ser do 50 %.

Poden verse tódolos detalles destas modificacións no Real Decreto-ley 6/2023, de 19 de diciembre, por el que se aprueban medidas urgentes para la ejecución del Plan de Recuperación, Transformación y Resiliencia en materia de servicio público de justicia, función pública, régimen local y mecenazgo.

Cada vez son maiores os estímulos para facer doazóns en favor da biodiversidade da nosa bisbarra. Soamente coa vontade de colaboración de máis amantes da natureza poderemos incrementa-la nosa capacidade de actuación.

 
Hai dez meses fixemos un par de xornadas de voluntariado na nosa Reserva do Ollo da Roda. O obxectivo era eliminar un foco de tradescantia, unha planta exótica invasora de orixe americana. Estaba situado a carón da pista e ameazaba con expandirse pola zona húmida. Daquela logramos eliminalo completamente, sacando un total 370,25 kg de biomasa.

Pero, tal como é habitual nesta especie, erradicala definitivamente non é doado. De feito, na última inspección da zona atopamos moitos rebrotes. Por ese motivo convocamos unha xornada de voluntariado para o próximo domingo día 17, aproveitando que non vai chover.

Arrincar esta planta é un traballo doado e o lugar resulta de moi fácil acceso, polo que será unha xornada apta para todos.

O punto de encontro será o Centro de Saúde de Betanzos ás 9:30 horas, coa idea de rematar ás 14:00. Non fai falla levar ferramentas, pero pode ser útil conseguir uns protectores para os xeonllos e unhas luvas de pintor ou de xardineiro. Hai que lembrar vestir roupa axeitada e calzado robusto, pois o chan estará húmido. Por último, non esquecer algo de picar e de beber para cando fagámo-lo descanso a media mañá.

Se queres participar nesta xornada, por favor envíanos con antelación un correo cos teus datos (nome completo, DNI, móbil, data de nacemento e concello de residencia), para poder facerche un seguro de accidentes, comunicarche cambios de última hora e facilitárno-la organización. Na sección Contacto atoparás a información necesaria.

Punto de encontro: Centro de Saúde de Betanzos.
Data: Domingo, 17 de decembro de 2023.
Hora: Sairemos ás 9:30 e volveremos ás 14:00 horas.

Post data: Aínda que non choveu, o tempo frío e a proximidade das festas do Nadal non animou á participación, reducida a seis persoas. Aínda así logramos retirar 74,35 kg de tradescantia e 17 kg de lixo. Como quedou por arrincar boa parte do foco, teremos que convocar proximamente unha nova xornada.

A Deputación da Coruña financiará nun 80 % os seguros de voluntariado.

 
Nos dous últimos domingos organizamos senllas xornadas de voluntariado nas praias da Alameda e da Abeleira, coa fin de recolle-lo lixo que depositaron nelas os temporais de primeiros deste mes. Pero aínda falta por limpa-lo terceiro areal que apadriñamos: a praia Grande de Miño.

Hoxe estivemos nela centrados soamente en repasa-los rebrotes dun par de plantas exóticas invasoras. Co obxectivo de apaña-los refugallos, convocamos agora unha nova xornada de voluntariado ambiental para o próximo domingo día 26. Deste xeito aproveitaremos o bo tempo previsto, antes de que nos metamos de cheo no inverno e nas festas de Nadal.

Este areal é bastante extenso, polo que será precisa unha participación numerosa para lograr limpalo en toda a súa extensión.

O punto de encontro será o Centro de Saúde de Betanzos ás 9:30 horas, coa idea de rematar ás 14:00. Se decides ir directamente, lembra avisarnos para non te esperar inutilmente. Non te preocupes polas ferramentas, pero leva unhas luvas se as tes. Non esquezas algo de picar e de beber para cando fagámo-lo descanso a media mañá.

No caso de animarte a participar na conservación deste enclave proposto oficialmente para ser incluído na Rede Natura, envíanos con antelación os teus datos (nome completo, DNI, móbil, data de nacemento e concello de residencia). Así poderemos notificarche cambios de última hora, facerche un seguro de accidentes e facilitarasnos a organización. Na sección Contacto atoparás a información necesaria.

Punto de encontro: Centro de Saúde de Betanzos.
Data: Domingo, 26 de novembro de 2023.
Hora: Sairemos ás 9:30 e volveremos ás 14:00 horas.

Post data: Obxectivo cumprido. Primeiro pasamos pola praia da Abeleira, para recoller unha roda de camión que non puidemos levar na xornada precedente. Logo, os 14 participantes percorremos a praia Grande de Miño en toda a súa extensión, incluíndo tanto a zona supramareal coma o campo dunar. Retiramos un total de 613,35 kg de lixo, destacando entre os voluminosos dez rodas, varias marañas de cordas de batea e diversas estruturas plásticas, ademais de refugallos de todo tipo onde predominaban os restos de aparellos de pesca e de marisqueo. Cos resultados de hoxe, o retirado durante o mes de novembro nos tres areais que apadriñamos sumou 1.427,40 kg de lixo e 213,20 kg de biomasa de especies exóticas invasoras, grazas ó esforzo das 21 persoas que participaron nunha ou varias das xornadas.

A Deputación da Coruña financiará nun 80 % os seguros de voluntariado.

 
Sumándolle ós resultados da xornada do pasado domingo o feito por un par de persoas o luns e o martes, nestes tres días temos retirado 468,90 kg de lixo e 87,30 kg de biomasa de especies exóticas invasoras na desembocadura do río Lambre. Aínda que rematamos na praia da Alameda, está pendente unha recollida sistemática de lixo na veciña praia da Abeleira e seguir avanzando na eliminación do seu foco de tradescantia.

Os meteorólogos anuncian unha melloría do tempo a finais desta semana. Xa que logo, aproveitamos para convocar unha xornada de voluntariado ambiental na praia da Abeleira para o próximo domingo día 19. De novo, o traballo será sinxelo, apto para calquera, nun pintoresco entorno costeiro.

O punto de encontro será o Centro de Saúde de Betanzos ás 9:30 horas, coa idea de rematar ás 14:00. No caso de que decidas ir directamente, lembra avisarnos para non te esperar inutilmente. Non te preocupes polas ferramentas, pero leva unhas luvas e uns protectores para os xeonllos se os tes. Non esquezas algo de picar e de beber para cando fagámo-lo descanso a media mañá.

No caso de animarte a participar na mellora do estado ecolóxico deste enclave da Rede Natura, envíanos con antelación os teus datos (nome completo, DNI, móbil, data de nacemento e concello de residencia). Así poderemos notificarche cambios de última hora, facerche un seguro de accidentes e facilitarasnos a organización. Na sección Contacto atoparás a información necesaria.

Punto de encontro: Centro de Saúde de Betanzos.
Data: Domingo, 19 de novembro de 2023.
Hora: Sairemos ás 9:30 e volveremos ás 14:00 horas.

Post data: A xornada comezou con algo de orballo, pero afortunadamente parou pronto. Os trece participantes percorreron todo o areal apañando 345,15 kg de lixo. O máis pesado foi unha maraña de cordas de batea. Non logramos retirar unha roda de camión enterrada no esteiro, pero xa pasaremos por ela outro día. Tamén deu tempo a arrincar 87,5 kg de biomasa de tradescantia.

A Deputación da Coruña financiará nun 80 % os seguros de voluntariado.

 
Os últimos temporais teñen afectado intensamente á praia da Alameda. Modificaron o seu perfil, meteron area na zona arborada, tiraron os salgueiros e ameneiros máis próximos ó mar, deixaron no areal grandes moreas de bivalvos mortos e trouxeron moito lixo, que quedou ciscado por toda a praia.

Pouco podemos facer, excepto recolle-lo lixo. E hai que facelo antes de que próximos temporais o enterren baixo novas capas de area. Para este domingo día 12, os meteorólogos anuncian unha breve melloría do tempo, antes de volver a empeorar. Por ese motivo, convocamos unha xornada de voluntariado ambiental para retiralo. O traballo será sinxelo, apto para calquera, nun entorno agradable.

O punto de encontro será o Centro de Saúde de Betanzos ás 9:30 horas, coa idea de rematar ás 14:00. No caso de que decidas ir directamente, lembra avisarnos para non te esperar inutilmente. Non te preocupes polas ferramentas, pero leva unhas luvas se as tes. Aínda que non anuncian mal tempo, leva un impermeable por se cae algún chuvasco ocasional. O mellor calzado serán as botas de auga, pois a zona arborada está encharcada; as botas de montaña servirán no resto da praia. Non esquezas algo de picar e de beber para cando fagámo-lo descanso a media mañá.

Se queres botar unha man no mantemento deste areal da Rede Natura que apadriñamos dende o ano 2011, envíanos con antelación os teus datos (nome completo, DNI, móbil, data de nacemento e concello de residencia). Así poderemos notificarche cambios de última hora, facerche un seguro de accidentes e facilitarasnos a organización. Na sección Contacto atoparás a información necesaria.

Punto de encontro: Centro de Saúde de Betanzos.
Data: Domingo, 12 de novembro de 2023.
Hora: Sairemos ás 9:30 e volveremos ás 14:00 horas.

Post data: Os meteorólogos acertaron e tivemos unha xornada de calma, sen choiva, entre días de mal tempo. Os dez participantes comezaron percorrendo o intermareal, para aproveita-la marea baixa, deixando para o final a zona húmida. En total apañaron 445 kg de lixo, destacando como refugallos máis voluminosos unha enorme boia xa rota, unha pesada maraña de cordas de bateas e unha roda. Futuros temporais traerán de novo máis lixo, pero o que ten sido retirado xa non volverá ó mar.

A Deputación da Coruña financiará nun 80 % os seguros de voluntariado.

 
Hai uns meses o observatorio da lagoa de Sobrado presentaba un aspecto preocupante. A porta estaba rota, froito dun acto de vandalismo recente, e as paredes cheas de pintadas, consecuencia dun incivismo continuado. Pero o máis preocupante era unha deterioración causada polo paso do tempo que afectaba á súa integridade estrutural.

Tres dos piares estaban podrecendo, chegando a afundirse 27 centímetros. Isto provocou unha grave inclinación do observatorio e a deformación de toda a construción, motivo polo que a porta e as tres fiestras non pecharan; incluso empenáronse os paneis informativos situados no seu interior. Pero o máis grave era o risco de colapso, pois as vigas estaban a punto de desencaixarse.

A diferenza de amaños anteriores, realizados polo voluntariado, nesta ocasión a complexidade das reparacións levounos a contratar a uns profesionais. En agosto, tras levantalo en peso, estabilizaron o observatorio cunhas novas zapatas de formigón, aparafusaron reforzos nas xuntas das vigas, arranxaron a porta e as fiestras, puxeron unha base de pedra á escaleira de entrada e recolocaron os paneis informativos interiores.

Pero quedaba pendente o traballo de cepilla-las paredes para borra-las pintadas e facer unha boa limpeza, incluíndo o desmontado do panel informativo do exterior para poder lavalo. Tamén había que podar aquelas pólas dos salgueiros que impedían a observación das aves, antes de que a subida invernal do nivel da auga o impedira. O pasado mércores e máis hoxe un par de voluntarios achegáronse a Sobrado para rematar estes traballos.

Aínda así queda pendente unha última obra: Varias pedras do pequeno muro da parcela caeron. Pero reparar isto queda para o próximo ano.

A Deputación da Coruña financiará nun 80 % os gastos das obras no observatorio.

 
Hoxe estivemos no Instituto de Educación Secundaria Francisco Aguiar para explicarlle ó alumnado cal é a importancia da custodia do territorio como ferramenta para afronta-la perda de biodiversidade local, incluíndo un resumo da súa historia en distintos países occidentais e detallando as campañas que estamos desenvolvendo na nosa bisbarra. A mensaxe final que transmitimos foi a de que, no ámbito da conservación da natureza, non hai maior erro que o cometido por quen non fixo nada pensando que tan só podía facer ben pouco.

Cando hai unhas semanas fomos convidados polo Departamento de Bioloxía e Xeoloxía a impartir esta charla, dentro da materia de Xeoloxía e Ciencias Ambientais de segundo curso de bacharelato, aproveitamos para propoñerlle ó alumnado que participara nas actividades da X Semana de Custodia, de xeito que puideran ter un contacto inicial coas nosas actuacións dende a perspectiva do voluntariado ambiental. De feito, a maioría dos matriculados nesta materia participou na eco-regata e na xornada de limpeza no río Mendo, razón pola que agora teñen un coñecemento da custodia do territorio tanto teórico como práctico.

 
Hai dez anos que iniciámo-la celebración da Semana de Custodia do Territorio nas Mariñas, un evento anual que ten como misión difundir entre os cidadáns a necesidade de se implicar directamente na conservación do noso patrimonio natural a través da custodia do territorio, participando como voluntarios e doadores nas actuacións de mellora dos espazos naturais da nosa bisbarra. Co inicio do mes de setembro, xa é tempo de anuncia-la súa décima edición.

Titulamos o programa deste ano como As marismas mariñáns na encrucillada da conservación. Nun contexto de agravamento da crise climática, debemos lembrar que as marismas, ademais dos numerosos servizos ecosistémicos que nos proporcionan, forman parte do bioma que captura e confina de xeito seguro máis dióxido de carbono. Por este motivo debemos prestarlles especial atención e realizar esforzos serios na súa recuperación.

Dentro das actuacións que podemos acometer os cidadáns está a de retirar plásticos e todo tipo de refugallos. De feito, na marisma do Mandeo levamos recollidas 34 toneladas de lixo (34.285,10 kg) dende o ano 2014; boa parte desa cantidade grazas ós participantes nas eco-regatas da Semana de Custodia. De novo volveremos a facelo na deste ano, pero tendo tamén a oportunidade de que varios expertos nos permitan coñecer mellor os valores naturais que comparten as marismas dos ríos Mandeo, Lambre e Baxoi.

Por favor, descarga o programa e o cartel da Semana para compartilos no teu entorno persoal e redes sociais: así facilitarás que a información chegue a tódolos interesados en participar.

Para apuntarte nas actividades, por favor, ponte en contacto coa organización no teléfono 981 105 903 ou envía un correo electrónico a correo@fragasdomandeo.org cos teus datos (nome completo, DNI, data de nacemento, móbil, concello de residencia e actividades nas que desexas participar). Deste xeito terás un seguro de accidentes, recibirás indicacións detalladas por adiantado e facilitarasnos a organización.

Eco-regata na ría de Betanzos: Iniciámo-lo programa con esta multitudinaria recollida de lixo na marisma. Nas sete edicións anteriores retiramos un total de 18 toneladas (18.144,65 kg) de refugallos, pero aínda queda moito por apañar. Animamos a toda a cidadanía a participar nesta competición lúdica na que a rivalidade será por coida-la ría. As embarcacións partirán cos equipos de voluntarios do porto de Betanzos, mentres outros voluntarios quedarán no peirao axudando a descarga-los sacos de lixo. Colaboran na organización asociacións de Betanzos (ARBE e Lar de Unta), de Bergondo (Club de Remo Olímpico do Mandeo e Asociación Ría do Pedrido) e de Paderne (Roxín Roxal). Tamén colaboran o Concello de Betanzos, Protección Civil e comercial Vicente de la Fuente. Ponte en contacto connosco se queres participar, aínda que non teñas lancha, indicando se vas embarcarte ou ben axudar no porto. Máis datos na folla informativa.
Data: Sábado 16 de setembro, de 16:00 a 20:30 horas.
Lugar: Porto de Betanzos.

Explorando as marismas mariñáns: Como acto central da Semana programamos unha charla-coloquio con D. Joám Ferreiro, biólogo da SGHN experto na biodiversidade da zona intermareal do golfo Ártabro. Aínda que poderá seguirse presencialmente no Museo de Historia Natural de Ferrol, a charla será difundida telemáticamente, co obxecto de darlle maior audiencia; para conferirlle máis amenidade, terá un formato de entrevista, na que bos coñecedores do estado do noso patrimonio natural interrogarano sobre distintos aspectos das marismas e areais da nosa bisbarra.
Data: Xoves 21 de setembro, de 19:30 a 21:00 horas.
Lugar: Emisión telemática en directo (tamén dispoñible posteriormente en diferido) a través de Youtube na sesión do coloquio.

Noite de morcegos na xunqueira: A observación da natureza non remata co solpor. Un equipo da asociación Morcegos de Galicia ofrécenos a posibilidade de coñecer de preto os quirópteros que cazan insectos na marisma, utilizando detectores de ultrasóns e redes. Esta actividade forma parte da difusión do seu estudo sobre os morcegos galegos (proxecto SOnat). En particular, a prospección da xunqueira terá como obxectivo principal localiza-la presenza dun morcego migrador, o Pipistrellus nathusii, escaso e pouco coñecido no noso país. Máis datos na folla informativa.
Data: Venres 22 de setembro, de 20:00 a 22:00 horas.
Lugar: Partiremos dende o Centro de Saúde de Betanzos.

Limpeza simultánea de ríos: Este ano é a decimosexta edición da limpeza simultánea dos ríos galegos, que coordina o Proxecto Ríos. Para nós será a décima edición na que colaboremos. O ano pasado participamos 955 persoas e 63 entidades, logrando retirar máis de 8 toneladas de refugallos en treitos de ríos situados en 41 concellos. Este ano volveremos ó río Mendo para continuar recollendo lixo no entorno da ponte da Ermida. Por favor, ponte en contacto connosco previamente no caso de quereres participar. Máis datos na folla informativa.
Data: Domingo 24 de setembro, de 9:30 a 14:00 horas.
Lugar: Partiremos dende o Centro de Saúde de Betanzos.

Dentro dos espazos naturais da nosa bisbarra, as marismas son o tipo de hábitat que nos proporciona máis servizos ecosistémicos. Maltratadas durante décadas, xa vai sendo hora de aborda-la súa restauración de xeito sistemático con accións concretas. A Semana de Custodia é un evento consolidado, único na zona, na que ás persoas preocupadas polo patrimonio natural da nosa bisbarra atopan a oportunidade de actuar dunha forma directa, eficaz e coordinado na súa conservación.

O amor á natureza demóstrase con feitos, non con boas razóns.
 
A Deputación da Coruña financiará nun 80 % os seguros de voluntariado e apoia o proxecto SOnat de Morcegos de Galicia.

 
Na ribeira dereita do vello encoro das Pías medra un pequeno foco de tradescantia. Aínda que se sitúa augas arriba do treito de 7,6 km do río Mandeo que apadriñamos, pode chegar a coloniza-la beira do leito e logo propagarse augas abaixo, arruinando o traballo que levamos feito nos últimos anos para erradicar esta especie exótica invasora de orixe suramericano.

Co obxecto de evitar este risco, para o domingo día 3 temos programada unha xornada de voluntariado ambiental. Como as dimensións do foco aínda son reducidas, eliminalo non suporá moito traballo e será sinxelo, apto para calquera. O entorno ribeirego resulta fermoso e de fácil acceso, anunciando bo tempo o prognóstico meteorolóxico.

O punto de encontro será o Centro de Saúde de Betanzos ás 9:30 horas, coa idea de rematar antes das 14:00. No caso de que decidas ir directamente, lembra avisarnos para non te esperar inutilmente. Non te preocupes polas ferramentas, pero leva unhas luvas (mellor as de pintor ou as de cociña) e uns protectores para os xeonllos, se dispós deles. Non esquezas algo de picar e de beber para cando fagámo-lo descanso a media mañá.

Se queres axudarnos a manter en bo estado ecolóxico o espazo natural protexido ZEC Betanzos-Mandeo, envíanos con antelación os teus datos (nome completo, DNI, móbil, data de nacemento e concello de residencia). Así poderemos notificarche cambios de última hora, facerche un seguro de accidentes e facilitarasnos a organización. Na sección Contacto atoparás a información necesaria.

Punto de encontro: Centro de Saúde de Betanzos.
Data: Domingo, 3 de setembro de 2023.
Hora: Sairemos ás 9:30 e volveremos ás 14:00 horas.

Post data: A xornada desenvolveuse segundo o previsto. Por unha banda, malia o tempo chuvioso dos días previos, cumpriuse o prognóstico meteorolóxico e gozamos dun tempo agradable. Pola outra, eliminamos completamente o foco, pois os doce participantes arrincamos a bo ritmo toda a tradescantia, pesando 330,45 kg na báscula. Pero non podemos dalo por erradicado. Está situado nun punto onde o rio depositou area por riba das plantas, polo que é fácil que no futuro rebrote algún anaco que quedara enterrado. Non nos queda outra que vixialo até constata-la completa erradicación.

A Deputación da Coruña financiará nun 80 % os seguros de voluntariado.

 
Coa botadura inaugural da nosa lancha, xusto hoxe hai un ano, arrincou a campaña «Basuraleza: 12 meses, 12 toneladas». Tiña como misión limpar semanalmente a marisma da ría de Betanzos, superando neste período unha cifra mínima de lixo a retirar. Por este motivo hoxe hai que dala por concluída.

Se o 13 de xullo xa informabamos de que excederámo-lo peso posto como obxectivo, ¿canto é o resultado final? Tras un esforzo extraordinario nas últimas semanas, o balance destes últimos doce meses é que temos retirado máis de 15 toneladas, apañadas en 42 saídas. Exactamente 15.053,95 kg.

Se esta cifra é xa de por si notable, hai que lembrar que as nosas limpezas da ría non se teñen limitado a esta campaña. No ano 2014 organizámo-la primeira eco-regata para limpa-la ría, coa colaboración de varias entidades. Tras sete edicións, nas que logramos recoller 18.144,65 kg, e un par de xornadas de voluntariado na xunqueira de Souto, onde apañamos 1.086,50 kg, o total do que levamos retirado suma máis de 34 toneladas de lixo (34.285,10 kg).

Hai que salienta-la magnitude do esforzo. A marisma ten unha extensión aproximada de 315 hectáreas. O lixo está esparexido polo esteiro, polas xunqueiras e polos carrizais. Isto implica a necesidade de explorar unha superficie moi grande en busca de refugallos, que moitas veces están ocultos entre a vexetación. A isto se engade a dificultade para camiñar no esteiro ou entre a vexetación, baixo toda clase de inclemencias meteorolóxicas, e dependendo das mareas para acceder a moitas zonas.

Na marisma aínda queda unha gran cantidade de lixo. Por ese motivo, continuaremos programando xornadas de limpeza, entre elas a oitava edición da eco-regata no próximo mes de setembro.

Máis detalles na páxina dedicada ás limpezas da ría.