Os scouts axúdannos en Chelo

1 Abril 2017

 
Esta mañá achegáronse a Chelo seis mozos e mozas do grupo scout Chan, acompañados de dúas monitoras. Alí os esperabamos tres voluntarios de Fragas do Mandeo, para logo dirixirnos ó monte que custodiamos dende hai catro meses grazas a unha doazón.

Foto dos scoutsNel medra un bosque caducifolio, aínda novo. O obxectivo da xornada de voluntariado era eliminar tódolos eucaliptos de pequeno porte que aparecen polo medio, de maneira que as árbores autóctonas deixen de ter competencia e se rexenere totalmente o ecosistema.

O traballo non foi doado. A parcela ten moita pendente e, ademais, era a primeira vez que os scouts facían esta labor. Pero quedaron contentos desta experiencia, e nós agradecidos de que viñeran de Santiago de Compostela para botarnos unha man na conservación das fragas do río Mandeo.

Como non acabamos cos eucaliptos da parcela, aparte de que temos máis tarefas pendentes noutros montes, proximamente convocaremos novas xornadas de voluntariado. Se te animas a participar, ponte en contacto connosco (atoparás os datos necesarios na sección Contacto).


Alumnos de bioloxía colaboran na custodia

18 Marzo 2017

 
Foto dos alumnosHoxe acompañamos a un grupo de alumnos de bioloxía da Universidade da Coruña e a dous dos seus profesores nunha visita á praia da Alameda (Miño). O obxectivo era que os alumnos empezaran as prácticas de botánica baixo o método aprendizaxe-servizo, de acordo co convenio que ten asinado Fragas do Mandeo coa universidade.

Con este son tres os grupos de traballo. O día 6 acompañamos ó primeiro na visita ás reservas de anfibios do Catorce e do Ollo da Roda, e o día 13 achegámonos co segundo grupo para percorrer ás parcelas que custodiamos na Espenuca (Coirós). En todos estes lugares explicamos as actuacións que estamos levando a cabo e cales son as dificultades que atopamos para mellora-lo estado ecolóxico dos hábitats.

En total son 17 alumnos que estudarán a flora destes espazos, de maneira que o coñecemento que obteñan nos permita xestionalos con máis eficacia. Identificarán as especies exóticas invasoras presentes, determinarán a composición da vexetación autóctona e os datos que recollan ―sumados ós de futuros alumnos nos próximos anos― posibilitarán determina-la evolución da flora.


Derradeiro voluntariado do ano

11 Decembro 2016

 
Esta mañá oito persoas achegáronse ó lugar de Chelo para participar na última xornada de voluntariado do ano. O obxectivo era erradicar a tradescantia (Tradescantia fluminensis) no entorno da área recreativa.

Foto dos voluntariosA fortaleza desta planta exótica invasora é a súa fraxilidade. Cando se arrinca rompe moi facilmente, o que dificulta a súa retirada. Ademais, calquera cachiño que quede pode prender e recoloniza-la zona. Por iso hai que ser moi metódico na súa eliminación e tamén constante na supervisión posterior da zona.

Os voluntarios encheron unha saca cos restos (aproximadamente 1 m3). A maiores arrincaron hortensias (Hydrangea sp.), pois é unha especie orixinaria do Extremo Oriente, e dous pes de acacia negra (Acacia melanoxylon) que xa estaban collendo un bo tamaño.

Tras ter eliminado anteriormente outras catro invasoras, o próximo ano esperamos poder ter erradicado tódalas especies exóticas nas beiras do río Mandeo entre a pontella de Chelo e a ponte de Teixeiro (obviamente, coa excepción dos eucaliptos, pois para iso habería que contar co improbable permiso de numerosos propietarios).

Deste xeito mellorarémo-lo hábitat dun tramo de río que, malia ser moi frecuentado por veciños e visitantes, alberga na ribeira animais e plantas ameazadas, como o escaravello Carabus galicianus, o amarelle Narcissus asturiensis, e na auga moluscos como o mexillón de río (Margaritifera margaritifera) ou peixes como o salmón (Salmo salar).


A custodia do territorio diante da Administración

18 Novembro 2016

 
Invitados pola AGCT e a Deputación de Lugo, hoxe participamos na xornada Custodia do Territorio e Administracións Públicas celebrada no Centro de Interpretación Terras do Miño (Lugo).

Na nosa intervención tivemos a ocasión de expoñe-lo proxecto da reserva de anfibios do Catorce. Os organizadores estaban moi interesados en que explicáramos a un público composto principalmente por técnicos da Administración en qué consiste o acordo de custodia do territorio que asinamos co Concello de Coirós, cómo vincula a ambas entidades e as potencialidades da implicación directa no uso e na xestión dos espazos naturais por parte de entidades como a nosa.

A intención dos organizadores era achegar a práctica da custodia do territorio ós técnicos, funcionarios e políticos que xestionan terreos das administracións públicas e zonas pertencentes ós dominios públicos fluviais e marítimo-terrestres. Para elo elaboraron un intenso programa, que tamén contou coas intervencións de Antonio Ruíz (FRECT), Marc Ordeix (Museu del Ter), Martiño Cabana (AGCT) e Ramsés Pérez (ADEGA). Esperamos que este traballo de difusión facilite a colaboración das distintas Administracións coas entidades de custodia do territorio.


Dóannos un monte en Chelo

16 Novembro 2016

 
Esta tarde asinamos a escritura da doazón dun monte de 3.050 m2 de superficie que linda co río Mandeo. Dª. Maruxa López e o seu fillo D. Luisco Monteiro tiveron a xenerosidade de cederllo a Fragas do Mandeo para que conserve a perpetuidade os seus valores naturais.

Fotografía do doadorEste monte está preto do lugar de Chelo (Coirós), nun lugar moi accesible. Situado nunha ladeira de forte pendente, a zona inferior forma parte do espazo natural protexido ZEC Betanzos-Mandeo e alberga un bosque de ribeira considerado hábitat prioritario. No resto, as árbores caducifolias compoñen un bosque de ladeira frecuentado pola fauna local, tal como evidencian os numerosos carreiros que o cruzan.

Fragas do Mandeo está moi agradecida a Dª. Maruxa e D. Luisco por esta doazón. Aparte do valor ambiental intrínseco deste monte, esta é a segunda doazón que recibimos dende a nosa constitución. Esperamos que o seu xesto serva de exemplo e anime a outras persoas a cedernos montes que teñen un rendemento marxinal como explotacións forestais.

Fotografía do monteDoar montes a Fragas do Mandeo ten dúas vantaxes. A primeira, e máis importante, é a satisfacción de comprometerse activamente na conservación da natureza da nosa bisbarra, coa garantía da perdurabilidade. A segunda son as vantaxes fiscais: unha dedución de até o 30 % do valor doado no imposto da renda dos particulares (no caso de empresas, do 35 % no imposto de sociedades).

Se ti tamén estás a valorar a posibilidade de contribuír en favor da nosa biodiversidade, podes informarte na sección Colabora ou ben consultarnos directamente (na sección Contacto atopara-los datos que precises).


Recordando a Luís Muíño

14 Novembro 2016

 
Hoxe recibimos a triste noticia do falecemento de Luís Muíño.

Nas poucas ocasións que tivemos de tratalo, Luís mostrouse como unha persoa discreta, carácter acaído á súa condición de notario. Pero xa era menos convencional nesta profesión o seu amor pola natureza. De feito, sorprendía gratamente que a súa notaría estivera decorada con retratos de flora e de fauna feitos coa súa cámara.

En Fragas do Mandeo estabámoslle moi agradecidos polo xeneroso apoio que nos deu xusto no momento en que máis o precisabamos, no intre de constituírnos e botarnos a andar, cando eramos descoñecidos e careciamos de recursos. Mandamos desde aquí unha forte aperta ós seus familiares e amigos máis achegados.


Xornada no Ollo da Roda

22 Outubro 2016

 
Se a anterior xornada de voluntariado tivo unha participación elevada, hoxe só cinco persoas achegáronse até o Ollo da Roda. Seguramente o aspecto ameazante do tempo desanimou, pero o certo é que cumpriuse o prognóstico meteorolóxico de que non chovería en toda a mañá.

Nunha das parcelas que custodiamos neste enclave hai varios eucaliptos de bo tamaño no medio do bosque autóctono. Antes de eliminalos, precisábase rozar unha silveira que dificultaba o traballo. Hai un mes, grazas á xentileza do Distrito Forestal II, un tractorista rozouna, aparecendo un montón de lixo que estaba oculto baixo as silvas. Había que recoller estes refugallos antes de que viñera un madeireiro a corta-los eucaliptos, pois no caso contrario quedarían enterrados baixo os restos da talla.

Malia ser poucos, os voluntarios conseguiron rematar este traballo, ocupando o lixo recollido todo un remolque. Aínda sobroulles tempo, que aproveitaron para secar rebrotes de eucalipto noutra das parcelas custodiadas. Agora só falla que o madeireiro libere o bosque deses eucaliptos.


Rematada a primeira fase da reserva de anfibios

12 Outubro 2016

 
Esta mañá, 25 persoas achegáronse á reserva de anfibios do Catorce: o voluntario máis maduro era sesaxenario e o máis novo tiña… ¡18 meses! O obxectivo era tentar remata-la primeira fase de actuacións na reserva. Conseguírono.

Malia a dificultade de organiza-lo traballo dun grupo tan numeroso e diverso, cada un soubo buscar aquela tarefa que podía afrontar. Cortáronse eucaliptos con motoserra e con machados Pulaski, xuntáronse as toradas e amoreouse a ramallada, apañouse o lixo que apareceu e transportouse ó punto de recollida, cortouse algunha silveira e anciñouse a biomasa dunha charca renovada, arrincáronse toxos e retiráronse paus que estorbaban nos camiños. Os participantes quedaron tan cansados coma contentos polo traballo feito.

Pasados 99 días dende que asinamos o acordo de custodia do territorio co Concello de Coirós, coa axuda de 61 voluntarios que dedicaron un total de 384 horas, máis unha xornada laboral dun tractorista grazas á xentileza do Distrito Forestal II, as melloras do hábitat previstas na zona húmida están executadas, xusto cando empezan a chegar as choivas outonais.

Agora comeza a segunda fase. Temos que buscar financiamento externo para poder contratar profesionais que corten mediante métodos de escalada os eucaliptos que medran nas paredes da canteira, que retiren e procesen as uralitas con amianto contaminante, que coloquen un valado nos desniveis para evitar que os visitantes se esnafren accidentalmente, que elaboren os paneis informativos e que reformen un par de edificacións abandonadas, unha onde poidan acubillarse ante o mal tempo os visitantes e a outra como refuxio para morcegos e aves nocturnas.


Avances na reserva de anfibios do Catorce

2 Outubro 2016

 
Esta mañá seis voluntarios estiveron traballando duro na reserva. Carreando grandes pedras e colocándoas na beira dunha das charcas, reforzaron a barreira de retención da auga e melloraron as condicións do seu hábitat, pois baixo elas refúxianse os anfibios.

A falta de poucos días para que se cumpran tres meses dende a sinatura do acordo de custodia que nos permitiu conservar este enclave, os avances son notables: creamos catro novas charcas, aumentámo-la dimensión doutra e renovamos dúas que estaban colmatadas, retirando nelas o exceso de vexetación. Neste tempo tamén eliminamos eucaliptos e vexetación exótica invasora, amoreamos a ramallada abandonada na última corta, recollemos lixo, rozámo-lo exceso de mato e librámo-los camiños da vexetación que dificultaba o paso.

Soamente quedan pendentes pequenas intervencións para dar por rematada a primeira fase de actuacións. A prema por finalizala ven imposta pola proximidade das choivas outonais, que anegarán toda a zona húmida e atraerán de novo ós anfibios, o que dificultaría as tarefas de mellora do hábitat.

Calquera que coñecera o estado deste enclave antes do acordo acollerá con satisfacción esta metamorfose. Hai que agradecerlla a 56 voluntarios, que lle dedicaron 304 horas do seu tempo libre, e ó Distrito Forestal II, que nos cedeu un tractorista durante unha xornada de traballo.


Estudantes de bioloxía traballan na reserva

15 Setembro 2016

 
Malia as ameazas de choiva, 11 membros da Asociación Estudantil Bota e Bata da Universidade de Santiago de Compostela, acompañados por dous voluntarios de Fragas do Mandeo, foron traballar esta tarde á reserva de anfibios do Catorce.

Antes de poñerse mans á obra, estes estudantes de bioloxía puideron observa-los avances da primeira fase de melloras do hábitat da reserva. Tras unha prolongada seca, esta semana comezou a chover con forza, polo que xa se anegaron as charcas, tanto as que xusto acabamos de escavar coma as que renovamos debido a que estaban colmatadas. Así puidemos comprobar que a intervención realizada, na que contamos coa axuda de persoal e maquinaria do Distrito Forestal II, deu o resultado previsto.

Posteriormente os voluntarios procederon a arrincar un exceso de espadanas que atacaba unha das charcas, secaron eucaliptos, amorearon paus e recolleron o lixo que a roza do mato deixou á vista.

Esta xornada de voluntariado ambiental ofreceulles a estes futuros biólogos a oportunidade de coñecer un caso práctico de restauración ambiental dun espazo degradado, onde para ter éxito hai que ponderar numerosos parámetros. Marcharon contentos da experiencia e nós agradecidos pola súa colaboración.


Uso de cookies: Este sitio web emprega cookies para mellora-la experiencia de usuario. Se continúa navegando consente a aceptación de ditas cookies e acepta a nosa política de cookies (se pincha no enlace obterá máis información).