Participa

É a túa elección

Aparte das achegas económicas e doazóns, hai outras maneiras de participar.

Faite voluntario

Hai moitos xeitos de axudarnos. Se tes algo de tempo libre e es amante da natureza, ponte en contacto connosco. As túas habilidades persoais ou coñecementos profesionais poden sernos de grande axuda: se debuxas ben podes facernos un cartel, se es enxeñeiro técnico agrícola podes asesorarnos nas medicións e nas taxacións, se fas boas fotos poderán servirnos para ilustra-la nosa web…

Axúdanos a mercar fincas

Escolle a maneira de participar en función do teu tempo libre e das túas capacidades

Buscar fincas axeitadas nas ribeiras do Mandeo e do Mendo, dende Betanzos até Aranga ou Curtis, non é doado. Se coñeces a algún propietario que venda barato, ponte en contacto connosco. Non importa que a finca ou monte teña moita pendente, que estea afastada ou sexa difícil chegar a ela. Se a podemos pagar, interésanos.

Difunde a nosa misión

Se tes un local ou negocio polo que pase xente, axúdanos a divulga-la nosa actividade. Leva uns folletos e ponos nun lugar visible. Se alguén se interesa, explícalle o que facemos. Se coñeces a algunha persoa preocupada polo medio ambiente, fálalle de nós.

Implica a outras entidades

Se es membro dunha asociación ou dun club deportivo, comenta na xunta directiva as posibilidades de que a entidade se faga colaboradora ou participe nas accións de divulgación e voluntariado. Se a empresa na que traballas ten unha liña de responsabilidade social corporativa, coméntalle a posibilidade de investir na custodia do territorio.

Comparte información naturalista

Se tes información sobre o hábitat ou especies da bisbarra de As Mariñas que queiras compartir na nosa web, ou podes facilitarnos información específica que nos permita mellora-lo noso traballo, como citas de especies ou bibliografía específica, non dubides en poñerte en contacto connosco.

Anúncianos en Internet

Se tes presenza na web, hai un xeito moi sinxelo de apoiarnos. Basta con que escollas un dos anuncios que amosamos na sección Usa un banner e o copies no teu blog, páxina web ou rede social. Desta forma os teus seguidores tamén coñecerán a nosa iniciativa.

Visita a nosa páxina web

Infórmate das nosas actividades, das necesidades de voluntarios, da marcha na adquisición de fincas, dos balances anuais, etc. Se non atopas o que buscas, consulta a sección Contacto para escolle-la mellor maneira de comunicarte connosco.

Data publicación: 6-7-2010
Última modificación: 26-8-2014
>> Páxina seguinte: Usa un banner

Uso de cookies: Este sitio web emprega cookies para mellora-la experiencia de usuario. Se continúa navegando consente a aceptación de ditas cookies e acepta a nosa política de cookies (se pincha no enlace obterá máis información).