Unha boa noticia para estimular as doazóns

6 Maio 2020

 
Logo da Axencia TributariaO Boletín Oficial do Estado publica hoxe a decisión gobernamental de incrementa-las deducións no IRPF polas doazóns a entidades que, como Fragas do Mandeo, están acollidas ó réxime fiscal de incentivos ó mecenado.

Así, por exemplo, as persoas que nos fagan unha doazón de 100 euros este ano, recuperarán 80 euros mediante un desconto nos impostos que teñan que pagar na declaración da renda que presenten o próximo ano. Ademais, esta mellora aplícase con carácter retroactivo, de maneira que tamén se beneficiarán os que xa teñen feito doazóns no que vai de ano.

Podes atopar tódolos detalles das deducións aplicables a particulares (IRPF) e a empresas (imposto de sociedades) nos artigos 19 e 20 do texto actualizado da Ley 49/2002, de 23 de diciembre, de régimen fiscal de las entidades sin fines lucrativos y de los incentivos fiscales al mecenazgo.

Resumindo: Un bo estímulo para que, beneficiándote destas deducións, poidamos seguir mercando montes de interese ambiental destinados a conserva-la nosa biodiversidade.


Seguimos activos: charla o día 17

2 Maio 2020

 
Cando o 14 de marzo iniciouse o confinamento, o ritmo de traballo que levabamos era notable. O lixo recollido sumaba 2.824 kg, acorde co obxectivo de lograr retirar un total de 10 toneladas no ano 2020. A eliminación de especies exóticas totalizaba 1.049 kg de biomasa, incluíndo tanto invasoras (crocosmia, tradescantia, plumacho, budleia, cala, ligustro asiático e acacia negra) como naturalizadas (palmeira canaria e evónimo xaponés). Soamente de crocosmia tiñamos desenterrados 2.501 tubérculos. Na cifra de biomasa non incluímos os rebrotes de eucalipto que eliminamos no repaso da zona de monte da reserva do Catorce. Tampouco os dezaseis chopos híbridos que cortamos na reserva do Ollo da Roda: dado o seu enorme tamaño tivemos que contratar a profesionais expertos en poda de altura para abatelos sen danar o bosque autóctono.

¿Que fixemos en todo este tempo de encerro? As limitacións impostas non significaron un parón total. Por unha banda estivemos coidando das máis de duascentas árbores (carballos, loureiros e pradairos) que temos pendentes de transplantar ó monte. Igualmente atendemos o viveiro onde botamos máis de 2.500 sementes de estripeiro, abruñeiro e loureiro. Pero sobre todo, aproveitamos para avanzar moito traballo administrativo e de mantemento da web pendentes.

Tamén dedicámonos a coidar da nosa mascota Dona. Rompeu os ligamentos cruzados dunha pata un dos últimos días que estivemos recollendo lixo. Tras operala, houbo que axudala a mante-lo descanso durante o súa longa convalecencia. Aínda que xa pode camiñar de novo, esta lesión significa a súa xubilación, tras acompañarnos nas nosas actividades durante case unha década, pois naceu a véspera da constitución de Fragas do Mandeo.

O certo é que, mentres todos estamos pechados, a natureza está a segui-lo seu curso. En canto poidamos saír ó monte, iremos revisa-la situación das zonas que custodiamos. Preocúpanos o estado das árbores noviñas na parcela da Espenuca, pois este ano aínda non lles limpamos a vexetación arredor delas. Tamén o avance das especies exóticas invasoras, especialmente o caso da tradescantia no rego das Bouzas e na praia da Abeleira. Cando as autoridades sanitarias xa permitan á xente reunirse, retomarémo-la convocatoria de novas xornadas de voluntariado para acomete-los traballos máis urxentes.

Mentres, para comentar en detalle a situación actual e as nosas previsións, aproveitaremos o ofrecemento do Grupo Naturalista Hábitat de usa-la súa plataforma de videoconferencias. Emitiremos en directo o domingo día 17 pola tarde e de maneira que o público poida facernos as preguntas que desexe. Pensando no caso das persoas ocupadas a esa hora, a charla tamén poderá verse en diferido.

Como complemento, días antes da charla vai estrearse a iniciativa O Faiado de Hábitat Protexe. Nesta páxina web os interesados poderán poxar por unha serie de lotes de produtos e de actividades. A poxa rematará cando finalice a charla, momento no que coñeceremos os gañadores. Nesta ocasión os fondos recadados irán destinados integramente ás actuacións de conservación da natureza que realiza Fragas do Mandeo.

Lugar: Acceso á sala de conferencias virtuais do Grupo Naturalista Hábitat a través de Youtube ou a través de Facebook.
Data: Domingo, 17 de maio de 2020.
Hora: 19:00 horas.


Sexto voluntariado na praia da Abeleira

1 Marzo 2020

 
Esta mañá estivemos de novo na praia da Abeleira (Paderne) con integrantes do Proxecto Lewo da Xunta de Galicia. Viñeron para seguir axudándonos na nosa campaña de eliminación das invasoras na desembocadura do río Lambre, dentro do espazo natural protexido ZEC Betanzos-Mandeo.

Nesta sexta xornada, as sete rapazas e os catro rapaces, acompañados de dous monitores de Ribeirán, estiveron focalizados na retirada de tradescantia.

O prognóstico meteorolóxico era bastante malo, pero o tempo foi aguantando sen chover en toda a mañá. A dificultade no traballo veuse incrementada nesta ocasión pola aparición de ortigas, que se sumaron ás abundantes silvas á hora de estorbar.

Aínda así os voluntarios bateron unha marca na cantidade de tradescantia recollida, pois a biomasa retirada pesou 503 kg. Tamén foron recollendo os refugallos que atopaban, entre eles un televisor, pesando o lixo un total de 83 kg.


Xornada de voluntariado o domingo 23

16 Febreiro 2020

 
Hai uns días retiramos máis de media tonelada de lixo na contorna do observatorio ornitolóxico de Souto, na ribeira dereita da ría de Betanzos. Aínda así quedaron moitos refugallos, pois non collían máis no remolque. Por este motivo imos volver o próximo domingo, pois prognostican bo tempo.

Foto dos voluntariosIgual que na ocasión anterior, aproveitaremos que a marea estará baixa para dedicar un pouco de tempo a observa-las numerosas aves acuáticas que utilizan o espazo natural protexido ZEC Betanzos-Mandeo como lugar de invernada e de paso migratorio, antes de marchar a criar no norte europeo.

Tal como facemos habitualmente, o punto de encontro será o Centro de Saúde de Betanzos, para compartir vehículos (os que vaian directamente deben avisarnos para non esperalos inutilmente). Como imos andar pola xunqueira, é necesario levar botas de auga e tamén luvas (mellor as de goma). Ó haber risco de meter accidentalmente un xunco no ollo ó agacharse para recolle-los refugallos, tamén é recomendable levar gafas (de sol, graduadas ou de seguridade). Non te preocupes polas ferramentas, pero non esquezas levar algo de comer e de beber para a pausa de media mañá.

Se queres colaborar na limpeza da ría, envíanos con antelación os teus datos (nome completo, DNI, data de nacemento, código postal e móbil). Así poderemos notificarche cambios de última hora, facerche un seguro de accidentes e facilitarasnos a organización. Na sección Contacto atoparás a información necesaria.

Punto de encontro: Centro de Saúde de Betanzos.
Data: Domingo, 23 de febreiro de 2020.
Hora: Sairemos ás 9:30 e volveremos ás 14:00 horas.

A Deputación da Coruña financiará nun 80 % os seguros de voluntariado.

Post data: ¡Volvemos retirar máis de media tonelada de lixo! En concreto, os quince voluntarios que participamos na xornada apañamos 505,5 kg de refugallos. Con esta limpeza o peso total da basuraleza que levamos retirado neste ano ascende a máis de dúas toneladas: exactamente 2.384,5 kg.

Foto dos voluntariosO máis voluminoso que atopamos foron dúas rodas e un tambor de lavadora. Pero os que deron máis traballo foron os plásticos agrícolas, especialmente as mallas para o cultivo de leguminosas, pois estaban enguedelladas coa vexetación e medio enterradas.

Antes de inicia-la limpeza, o ornitólogo do Grupo Naturalista Hábitat, D. Santiago Vázquez, falounos da variedade de fauna que alberga a ría de Betanzos. Aínda que a néboa dificultaba a observación, foi amosándonos diversas aves que puidemos contemplar coa axuda dos telescopios (tartaraña das xunqueiras, garzota común, ánsar bicocurto, lavanco real, cerceta real, mazarico curlí, bilurico pativerde, bilurico común, bilurico bailón, etc.). Un bo prólogo para animarnos a mellora-lo estado de conservación da marisma.


Media tonelada de lixo menos na ría

8 Febreiro 2020

 
Está mañá varios empregados da empresa Naturgy e familiares seus participaron na terceira xornada de voluntariado que temos programado con eles. Nesta ocasión achegámonos ó observatorio ornitolóxico de Souto, situado na ribeira dereita da ría de Betanzos.

Foto dos voluntariosAntes de poñernos a traballar, dedicamos un tempo a explicar os valores naturais deste espazo natural protexido, mentres observabamos cos telescopios as numerosas especies de aves que se alimentaban no esteiro (cullereiro común, garza real, garzota común, cisne real, ánsar bicocurto, lavanco real, cerceta real, mazarico curlí, bilurico pativerde, bilurico bailón, etc.).

Posteriormente, mentres os seis cativos gozaban dunha mañá campestre, os nove adultos introduciámonos no xuncal para apañar botellas, plásticos e todo tipo de refugallos, entre eles dúas rodas. Os resultados falan claramente: máis de media tonelada de lixo. Enchemos un total de 45 sacos que pesaron 581 kg e ocuparon até os topes os 4 m3 de capacidade do remolque en que os transportamos. Con esta actuación, no que levamos de ano, xa temos retirado dos ríos e da costa 1.811,5 kg de lixo e de entullos.

Aínda así, a contorna do observatorio non quedou totalmente limpa. Xa que logo, esperamos programar proximamente outra xornada de voluntariado para remata-la limpeza.

Agradecemos a Naturgy ter promovido entre os seus empregados esta xornada de voluntariado ambiental.


As nosas reservas na Casa da Auga

30 Xaneiro 2020

 
Co gallo da celebración do día mundial dos humedais o próximo domingo día 2 de febreiro, hoxe estivo desenvolvéndose na coruñesa Casa da Auga o Seminario técnico sobre recuperación ambiental de humedais, dentro dos encontros entre especialistas no marco do proxecto Life Fluvial.

Logo do Life FluvialA nosa intervención centrouse nas reservas do Catorce e do Ollo da Roda, explicando o contexto en que as creamos, as dificultades que atopamos, as características ambientais destes dous humedais e as accións realizadas para mellora-los seus hábitats e para acolle-las ineludibles visitas.

Aínda que o Life Fluvial non se complementa co noso traballo, nin somos beneficiarios en modo algún deste proxecto, a nosa participación neste seminario foi unha boa ocasión para explicar ós expertos presentes que somos unha entidade orientada ó obxectivo de conserva-lo patrimonio natural da nosa bisbarra mediante accións directas, eficaces e duradeiras, tal como temos demostrado coa creación e mantemento destas dúas reservas.


Entrevista en Roxín Roxal

28 Xaneiro 2020

 
Logo da Asociación Cultural Roxín RoxalHoxe estivemos no estudo de Roxín Roxal, onde participamos nunha longa entrevista que emitiron en directo polas súas canles de vídeo e de radio por Internet.

Na conversa con María Gutiérrez Calvete puidemos explica-lo noso xeito de aborda-la conservación da natureza a través da custodia do territorio e detallar todo o traballo que levamos efectuado nestes anos.

A entrevista pode visualizarse en YouTube ou en Radio Filispim; tamén pode escoitarse en Ivoox.


Voluntariado na marisma do Baxoi

26 Xaneiro 2020

 
Esta mañá 12 persoas participamos nunha xornada de voluntariado na zona norte da marisma do río Baxoi. O motivo de actuar neste xuncal situado a carón da praia Grande de Miño era a existencia de dous focos de plumachos e a presenza de bastante lixo.

Os participantes dividíronse en dous equipos. As cinco persoas que se centraron na recollida de lixo percorreron o xuncal logrando retirar 156,5 kg de refugallos. O resto dedicou o tempo a eliminar unha palmeira canaria e 10 macollas de plumachos, pesando esta biomasa 241 kg.

As catro macollas que medraban no noiro a carón da ponte deron bastante traballo a causa do desnivel, o que obrigou a utilizar unha corda co seu arnés para evitar accidentes. Nas inmediacións da saída da autoestrada eliminaron a palmeira canaria e o resto dos plumachos.

Con esta actuación non se rematou co lixo nin coas especies exóticas invasoras desta marisma, pero hoxe a súa zona norte presenta un estado ecolóxico indubidablemente mellor.


Despois do Mandeo, limpamos o Mendo

24 Xaneiro 2020

 
Se a primeiros de mes fixemos a primeira limpeza anual sistemática do tramo que apadriñamos no río Mandeo, nesta semana tocoulle ó río Mendo, no treito que vai dende a ponte das Moas até a ponte de Taibo.

Dividimos o percorrido circular de 18 km de ribeira en tres etapas, nas que recollemos 60,5 kg de lixo diverso, principalmente pequenos plásticos esnaquizados polas fortes enxurradas que quedaron enganchados na vexetación. Tamén retiramos catro bolsas con cachos de uralita con amianto contaminante ―incívicamente abandonadas a carón do río― que pesaron en total 53 kg.

No tocante a especies exóticas invasoras, eliminamos dous pequenos focos de crocosmia, outro de tradescantia e unha acacia negra. Localizamos outras catro acacias negras no leito do río, pero non puidemos arrincalas debido ó seu tamaño, polo que volveremos coas ferramentas axeitadas para logralo.

As recollidas de lixo periódicas nos ríos son indispensables para reduci-la basuraleza, en beneficio da biodiversidade que albergan e permitindo que poidamos gozar da súa paisaxe sen a interferencia destas mostras da incuria humana.


Xornada de voluntariado o domingo día 12

8 Xaneiro 2020

 
Imos empezar as xornadas de voluntariado deste ano o próximo domingo, pois o prognóstico meteorolóxico afirma que non vai chover pola mañá.

Foto dos voluntariosAs últimas enchentes do Mandeo teñen removido a terra e a area na canle que forma o río na área recreativa de Chelo (Coirós). Así deixou á vista cachos de ladrillos, tellas, azulexos e outros materiais de construción que alí foron ciscados hai moitos anos. Xa fixéramos unha recollida hai tempo, pero agora fai falla repetila se queremos manter esta zona libre de artefactos humanos.

Como habitualmente, o punto de encontro será o Centro de Saúde de Betanzos, para compartir vehículos (os que vaian directamente deben avisarnos para non esperalos inutilmente). Pola canle non está correndo auga, pero é conveniente levar botas de auga e luvas de goma (as de coiro non son recomendables para esta tarefa). Non te preocupes polas ferramentas, pero lembra levar algo de comer e de beber para a pausa de media mañá.

Se queres participar nesta primeira xornada de voluntariado ambiental do ano, envíanos con antelación os teus datos (nome completo, DNI, data de nacemento, código postal e móbil). Así poderemos notificarche cambios de última hora, facerche un seguro de accidentes e facilitarasnos a organización. Na sección Contacto atoparás a información necesaria.

Punto de encontro: Centro de Saúde de Betanzos.
Data: Domingo, 12 de xaneiro de 2020.
Hora: Sairemos ás 9:30 e volveremos ás 14:00 horas.

A Deputación da Coruña financiou nun 80 % os seguros de voluntariado.

Post data: Afortunadamente o día foi menos frío do esperado, aínda que daba pereza mete-las mans na auga para recoller entullos. Os seis participantes na xornada retiramos a bo ritmo ladrillos, tellas, azulexos e outros prefabricados usados na construción, logrando deixar limpa a canle e as súas beiras a media mañá. Cos entullos enchémo-las 20 esportas que levábamos, que pesaron 743 kg, ó cal hai que sumar 35 kg de ferros e lixo diverso. Futuras enxurradas descubrirán novos entullos, pero mentres esta canle presentará un aspecto natural.


Uso de cookies: Este sitio web emprega cookies para mellora-la experiencia de usuario. Se continúa navegando consente a aceptación de ditas cookies e acepta a nosa política de cookies (se pincha no enlace obterá máis información).