Hoxe pasámo-la mañá co alumnado do curso de monitores de tempo libre que está a impartir a Escola de Tempo Libre Fervenza na Casa da Mocidade de Bergondo.
A través das nosas explicacións, o grupo de estudantes —formado por 17 alumnas e un alumno— puido coñecer cales son os principais problemas ecolóxicos dos espazos naturais da nosa bisbarra, así como a maneira de abordalos mediante as técnicas de apadriñamento e de custodia do territorio. Diante do deterioro do noso patrimonio natural, indicamos que son imprescindibles as actuacións de restauración de hábitats como as que estamos a facer continuadamente. Xa cunha perspectiva máis didáctica, explicámoslles a forma na que, no seu futuro laboral, poden organizar xornadas de voluntariado ambiental de xeito que sexan realmente eficaces e lles resulten atractivas ós participantes.
Co obxectivo de que coñeceran resultados prácticos, como remate visitámo-la nosa Reserva de Anfibios do Catorce, para logo facer unha breve visita a parcelas que temos des-eucaliptizado no monte da Espenuca.
