Fragas do Mandeo

 
Hoxe recibimos do Concello de Coirós a súa axuda anual.

O pasado sábado tivo lugar o acto no que o Concello presentou as axudas destinadas ás entidades activas no seu termo municipal. Lamentablemente, por un imprevisto, non puidemos estar presentes para expresar o noso agradecemento polo seu continuado apoio, único entre os sete concellos da bisbarra nos que actuamos.

Estas axudas teñen a importante vantaxe de que non precisan trámites tediosos, nin tampouco están ligadas a proxectos concretos, polo que podemos destinalas a aquelas necesidades de actuación que van xurdindo ó longo do ano nas parcelas que custodiamos. Isto fainas moito máis versátiles que outras subvencións.

Esperemos que no futuro logremos un recoñecemento similar por parte do resto dos concellos da bisbarra, ós que xa lles solicitamos explicitamente un apoio semellante o ano pasado, precisamente poñendo como exemplo a Coirós.

 
A mediados de decembro organizamos unha xornada de voluntariado na nosa Reserva do Ollo da Roda para eliminar un foco de tradescantia. Pero o caso é que daquela o pequeno grupo de participantes non deu rematada a eliminación deste foco situado a carón da pista. É importante acabar con el canto antes, pois ameaza con expandirse pola zona húmida. Por ese motivo convocamos unha xornada de voluntariado para o próximo domingo día 4, aproveitando que o tempo será bo.

Arrincar esta planta é un traballo doado e o lugar resulta de moi fácil acceso, polo que será unha xornada apta para todos.

Tal como facemos habitualmente, quedaremos no Centro de Saúde de Betanzos ás 9:30 horas, coa idea de rematar ás 14:00. Non fai falla levar ferramentas, pero pode ser útil conseguir uns protectores para os xeonllos e unhas luvas de pintor ou de xardineiro. Hai que lembrar vestir roupa axeitada e calzado robusto (o mellor son as botas de auga), pois o chan estará húmido. Por último, non esquecer algo de picar e de beber para cando fagámo-lo descanso a media mañá.

Se queres participar nesta xornada, por favor envíanos con antelación un correo cos teus datos (nome completo, DNI, móbil, data de nacemento e concello de residencia), para poder facerche un seguro de accidentes, comunicarche cambios de última hora e facilitárno-la organización. Na sección Contacto atoparás a información necesaria.

Punto de encontro: Centro de Saúde de Betanzos.
Data: Domingo, 4 de febreiro de 2024.
Hora: Sairemos ás 9:30 e volveremos ás 14:00 horas.

Post data: Os 10 participantes da xornada retiramos 117 kg de tradescantia e 271,95 kg de lixo. Como tampouco logramos rematar co foco, ó día seguinte achegámonos catro persoas para continua-lo traballo, sacando 92,20 kg de tradescantia e 1,30 kg de lixo. Sumando estes resultados ó feito na xornada de decembro, totalizamos 283,55 kg de tradescantia e 290,25 kg de lixo. Controlar este foco é importante, dada a súa perigosidade. Agora temos que estar atentos, revisando con frecuencia a reaparición desta tenaz invasora ó longo de todo este ano.

A Deputación da Coruña financiará nun 80 % os seguros de voluntariado.

 
Hoxe rematámo-la campaña invernal de eliminación de tradescantia no río Mandeo.

Erradicar esta planta exótica invasora de orixe suramericano non é doado. Trala eliminación inicial dos focos, hai que repasalos periodicamente. Basta que se teña deixado un pequeno fragmento de planta para que rebrote e chegue a recuperar toda a extensión do foco orixinal en pouco tempo.

Actualmente estamos percorrendo o río Mandeo no treito situado entre as pontes de Entrambasaugas e de Teixeiro. Isto significa camiñar 22 km por ambas beiras do río revisando atentamente a vexetación. Tamén percorremos o rego das Bouzas, dende a estrada de Espenuca até a súa desembocadura no lugar de Chelo, o que suma 2,7 km máis, malia que discorre por un terreo moi abrupto.

En total retiramos do río Mandeo 70,20 kg de tradescantia e 1,15 kg de lixo. No rego das Bouzas foron 172 kg de tradescantia e 90,40 kg de lixo; neste curso de auga puidemos observa-la presenza de varias especies ameazadas, froito do noso traballo para mellora-lo hábitat.

 
Esta mañá estivemos acompañando a membros do Grupo Naturalista Hábitat nunha visita á lagoa de Sobrado dos Monxes para observar aves.

Chegamos con suficiente antelación para poder face-las tarefas periódicas de mantemento, que inclúen a limpeza do observatorio ornitolóxico e a recollida de lixo nas nosas parcelas, na contorna da lagoa e no treito que apadriñamos de camiño xacobeo.

Logo, unha vez chegados os 26 participantes nesta actividade dos Encontros Naturalistas de Hábitat, puidemos explica-las tarefas de custodia que estamos realizando alí dende a constitución da nosa entidade, detallando as importantes reparacións que fixemos no observatorio o ano pasado.

A difusión dos salientables valores naturais desta lagoa resulta imprescindible para garanti-la súa conservación en estado óptimo.

 
Esta mañá estivemos no monte da Espenuca deseucaliptizando unha parcela chamada Penizás. Ten unha extensión grande (1,5 hectáreas) e está situada na ladeira suroeste do monte, preto do cumio, nun lugar moi visible dende as poboacións próximas.

O traballo está resultando moi duro, debido a que a densidade de eucaliptos é altísima, o terreo ten unha elevada pendente e presenta grandes bloques de rochas, razón pola que en ocasións hai que reforza-la seguridade usando arneses e cordas. Debido a estas dificultades, temos organizada a eliminación dos eucaliptos en fases.

Dende novembro estamos a traballar na metade sur da parcela. Na primeira fase arrincamos de raíz as árbores máis pequenas, deixando o monte limpo e transitable. Deste xeito facilitámo-las tarefas da actual segunda fase, consistente en corta-los de maior grosor, amoreando coidadosamente toda a súa ramallada para que así podreza rapidamente e de paso proporcione refuxio a diversos animais.

Pero o caso é que hoxe decidimos deter este traballo. A natureza é quen nos determina a axenda e xa chegou a tempada de plantar, polo que agora temos que dedicarnos a transplantar as árbores reproducidas no noso viveiro, reforestando aqueles montes que xa temos deseucaliptizado. Tamén debemos continuar co repaso invernal das especies exóticas invasoras. En canto rematemos ámbalas dúas tarefas, volveremos a esta parcela co obxectivo de librala totalmente dos eucaliptos.

 
Cando remata o ano paga a pena botar un ollo ó que se ten feito. Estar vendo acotío o enorme volume das actuacións necesarias para recupera-lo patrimonio natural da nosa bisbarra, resulta desmoralizador. Por iso, contabilizar o que temos logrado durante o ano pasado é a mellor maneira de coller forzas para encarar este ano que comeza.

Os datos son incuestionables. No ano 2023 retiramos dos nosos espazos naturais máis de 13 toneladas de lixo (13.139,15 kg). En canto a especies exóticas invasoras, a biomasa eliminada foi de máis de 3 toneladas (3.354,70 kg). Nos montes custodiados plantamos 518 árbores de 14 especies distintas procedentes do noso viveiro. Nel estamos a reproducir 18 especies de árbores e unha de arbusto, todas elas autóctonas da nosa bisbarra, usando sementes de ecotipo local recollidas na propia zona. Avanzamos na deseucaliptización do monte da Espenuca, cun intenso traballo na parcela Penizás. Avanzamos na eliminación do arborado exótico invasor na praia da Alameda. No observatorio ornitolóxico da lagoa de Sobrado realizamos importantes reformas para asegura-la súa integridade estrutural… Para obter todos estes resultados, realizamos un traballo equivalente a 446 xornadas de 8 horas.

No que respecta ó territorio custodiado, aumentámo-la superficie en propiedade en 4.530 m². Non é doado mercar montes cando dispoñemos de recursos económicos escasos. Afortunadamente, este ano xa serán aplicables as melloras dos beneficios fiscais por doazóns a entidades como a nosa, aprobadas hai uns días.

Resumindo: O ano pasado puxemos o listón moi alto. Aínda así, tentaremos superalo. Pero precisamos máis apoio privado, pois non podemos esperalo da Administración, nada proclive a colaborar coas entidades dedicadas á conservación da natureza.

Por ese motivo, se aínda non tes apostado por nós, por favor, medita a posibilidade de apoiarnos como voluntario, como doador, ou incluso das dúas maneiras. Podes atopar máis información nas seccións Colabora e Participa.

Deste xeito, compartirás connosco a satisfacción de facer algo eficaz polo patrimonio natural da nosa bisbarra.

¡Feliz aninovo!

 
Hoxe aparece unha boa noticia no Boletín Oficial do Estado: O goberno incrementa as deducións polas doazóns feitas a entidades que, como Fragas do Mandeo, están acollidas ó réxime fiscal de incentivos ó mecenado.

Até agora, a dedución do 80 % no IRPF soamente se aplicaba ás doazóns de até 150 euros; o próximo ano vai aplicarse ás doazóns de até 250 euros. Así unha persoa que nos doe 250 euros, recuperará na correspondente declaración da renda 200 euros.

No caso das empresas, a dedución no imposto de sociedades pasa de ser do 35 % a un 40 %; pero cando esa empresa foi mantendo ou incrementando esas doazóns dende dous anos antes, a dedución chega a ser do 50 %.

Poden verse tódolos detalles destas modificacións no Real Decreto-ley 6/2023, de 19 de diciembre, por el que se aprueban medidas urgentes para la ejecución del Plan de Recuperación, Transformación y Resiliencia en materia de servicio público de justicia, función pública, régimen local y mecenazgo.

Cada vez son maiores os estímulos para facer doazóns en favor da biodiversidade da nosa bisbarra. Soamente coa vontade de colaboración de máis amantes da natureza poderemos incrementa-la nosa capacidade de actuación.

 
Hai dez meses fixemos un par de xornadas de voluntariado na nosa Reserva do Ollo da Roda. O obxectivo era eliminar un foco de tradescantia, unha planta exótica invasora de orixe americana. Estaba situado a carón da pista e ameazaba con expandirse pola zona húmida. Daquela logramos eliminalo completamente, sacando un total 370,25 kg de biomasa.

Pero, tal como é habitual nesta especie, erradicala definitivamente non é doado. De feito, na última inspección da zona atopamos moitos rebrotes. Por ese motivo convocamos unha xornada de voluntariado para o próximo domingo día 17, aproveitando que non vai chover.

Arrincar esta planta é un traballo doado e o lugar resulta de moi fácil acceso, polo que será unha xornada apta para todos.

O punto de encontro será o Centro de Saúde de Betanzos ás 9:30 horas, coa idea de rematar ás 14:00. Non fai falla levar ferramentas, pero pode ser útil conseguir uns protectores para os xeonllos e unhas luvas de pintor ou de xardineiro. Hai que lembrar vestir roupa axeitada e calzado robusto, pois o chan estará húmido. Por último, non esquecer algo de picar e de beber para cando fagámo-lo descanso a media mañá.

Se queres participar nesta xornada, por favor envíanos con antelación un correo cos teus datos (nome completo, DNI, móbil, data de nacemento e concello de residencia), para poder facerche un seguro de accidentes, comunicarche cambios de última hora e facilitárno-la organización. Na sección Contacto atoparás a información necesaria.

Punto de encontro: Centro de Saúde de Betanzos.
Data: Domingo, 17 de decembro de 2023.
Hora: Sairemos ás 9:30 e volveremos ás 14:00 horas.

Post data: Aínda que non choveu, o tempo frío e a proximidade das festas do Nadal non animou á participación, reducida a seis persoas. Aínda así logramos retirar 74,35 kg de tradescantia e 17 kg de lixo. Como quedou por arrincar boa parte do foco, teremos que convocar proximamente unha nova xornada.

A Deputación da Coruña financiará nun 80 % os seguros de voluntariado.

 
Nos dous últimos domingos organizamos senllas xornadas de voluntariado nas praias da Alameda e da Abeleira, coa fin de recolle-lo lixo que depositaron nelas os temporais de primeiros deste mes. Pero aínda falta por limpa-lo terceiro areal que apadriñamos: a praia Grande de Miño.

Hoxe estivemos nela centrados soamente en repasa-los rebrotes dun par de plantas exóticas invasoras. Co obxectivo de apaña-los refugallos, convocamos agora unha nova xornada de voluntariado ambiental para o próximo domingo día 26. Deste xeito aproveitaremos o bo tempo previsto, antes de que nos metamos de cheo no inverno e nas festas de Nadal.

Este areal é bastante extenso, polo que será precisa unha participación numerosa para lograr limpalo en toda a súa extensión.

O punto de encontro será o Centro de Saúde de Betanzos ás 9:30 horas, coa idea de rematar ás 14:00. Se decides ir directamente, lembra avisarnos para non te esperar inutilmente. Non te preocupes polas ferramentas, pero leva unhas luvas se as tes. Non esquezas algo de picar e de beber para cando fagámo-lo descanso a media mañá.

No caso de animarte a participar na conservación deste enclave proposto oficialmente para ser incluído na Rede Natura, envíanos con antelación os teus datos (nome completo, DNI, móbil, data de nacemento e concello de residencia). Así poderemos notificarche cambios de última hora, facerche un seguro de accidentes e facilitarasnos a organización. Na sección Contacto atoparás a información necesaria.

Punto de encontro: Centro de Saúde de Betanzos.
Data: Domingo, 26 de novembro de 2023.
Hora: Sairemos ás 9:30 e volveremos ás 14:00 horas.

Post data: Obxectivo cumprido. Primeiro pasamos pola praia da Abeleira, para recoller unha roda de camión que non puidemos levar na xornada precedente. Logo, os 14 participantes percorremos a praia Grande de Miño en toda a súa extensión, incluíndo tanto a zona supramareal coma o campo dunar. Retiramos un total de 613,35 kg de lixo, destacando entre os voluminosos dez rodas, varias marañas de cordas de batea e diversas estruturas plásticas, ademais de refugallos de todo tipo onde predominaban os restos de aparellos de pesca e de marisqueo. Cos resultados de hoxe, o retirado durante o mes de novembro nos tres areais que apadriñamos sumou 1.427,40 kg de lixo e 213,20 kg de biomasa de especies exóticas invasoras, grazas ó esforzo das 21 persoas que participaron nunha ou varias das xornadas.

A Deputación da Coruña financiará nun 80 % os seguros de voluntariado.

 
Sumándolle ós resultados da xornada do pasado domingo o feito por un par de persoas o luns e o martes, nestes tres días temos retirado 468,90 kg de lixo e 87,30 kg de biomasa de especies exóticas invasoras na desembocadura do río Lambre. Aínda que rematamos na praia da Alameda, está pendente unha recollida sistemática de lixo na veciña praia da Abeleira e seguir avanzando na eliminación do seu foco de tradescantia.

Os meteorólogos anuncian unha melloría do tempo a finais desta semana. Xa que logo, aproveitamos para convocar unha xornada de voluntariado ambiental na praia da Abeleira para o próximo domingo día 19. De novo, o traballo será sinxelo, apto para calquera, nun pintoresco entorno costeiro.

O punto de encontro será o Centro de Saúde de Betanzos ás 9:30 horas, coa idea de rematar ás 14:00. No caso de que decidas ir directamente, lembra avisarnos para non te esperar inutilmente. Non te preocupes polas ferramentas, pero leva unhas luvas e uns protectores para os xeonllos se os tes. Non esquezas algo de picar e de beber para cando fagámo-lo descanso a media mañá.

No caso de animarte a participar na mellora do estado ecolóxico deste enclave da Rede Natura, envíanos con antelación os teus datos (nome completo, DNI, móbil, data de nacemento e concello de residencia). Así poderemos notificarche cambios de última hora, facerche un seguro de accidentes e facilitarasnos a organización. Na sección Contacto atoparás a información necesaria.

Punto de encontro: Centro de Saúde de Betanzos.
Data: Domingo, 19 de novembro de 2023.
Hora: Sairemos ás 9:30 e volveremos ás 14:00 horas.

Post data: A xornada comezou con algo de orballo, pero afortunadamente parou pronto. Os trece participantes percorreron todo o areal apañando 345,15 kg de lixo. O máis pesado foi unha maraña de cordas de batea. Non logramos retirar unha roda de camión enterrada no esteiro, pero xa pasaremos por ela outro día. Tamén deu tempo a arrincar 87,5 kg de biomasa de tradescantia.

A Deputación da Coruña financiará nun 80 % os seguros de voluntariado.