Xa está aberto o prazo para inscribirse no campo internacional de traballo que vai desenvolverse este verán en Chelo, ó pé do monte da Espenuca.
Entre os días 1 e 12 de agosto quince voluntarios colaborarán connosco na eliminación de especies exóticas invasoras no entorno do río Mandeo. Como resultado de tres anos de traballo, practicamente temos erradicadas as plantas invasoras en ambas marxes do río ó longo do tramo entre a pontella de Chelo e a ponte de Teixeiro. Desafortunadamente, hai varios focos de crocosmia (Crocosmia x crocosmiiflora) e de tradescantia (Tradescantia fluminensis) no rego das Bouzas, que desemboca no Mandeo a carón da pontella de Chelo. As enchentes poden arrastrar propágulos que logren prender nalgún punto do río onde as temos erradicado. Por este motivo é tan importante a cooperación dos voluntarios desta segunda edición do campo internacional.
Os traballos a realizar consistirán principalmente en desenterrar pacientemente os tubérculos das crocosmias, mirando de non deixar ningún. No caso da tradescantia basta con arrincar os seus fráxiles talos sen deixar atrás ningún cacho, pois calquera fragmento pode prender. Pero non todo será traballar, pois o programa contempla actividades culturais e turísticas que permitirán ós voluntarios coñece-la nosa bisbarra. Nel poden participar persoas de entre 18 e 30 anos, téndose reservado algunhas prazas para aquelas procedentes do estranxeiro e doutras comunidades autónomas.
Os campos de traballo son unha ferramenta de educación non formal que abrangue experiencias de participación e de voluntariado. Con eles promóvese a implicación da xuventude na sociedade, facilitan os intercambios entre territorios e buscan fomenta-los valores de convivencia, de tolerancia e de traballo en equipo.
Promovido por Fragas do Mandeo e solicitado polo Concello de Coirós, este campo está organizado pola Dirección Xeral de Xuventude, Participación e Voluntariado da Xunta de Galicia. A xestión correrá a cargo de Ribeirán Proxectos Naturais, contando con Jesús Díaz como director.
Para obter máis información e inscribirse, consulta a ficha do campo de traballo Monte da Espenuca 2017.