Fragas do Mandeo

No Diario Oficial de Galicia de hoxe, día 8 de novembro, aparece publicada a Orde do 27 de outubro de 2010 pola que se clasifica de interese para a defensa do medio natural de Galicia a Fundación Fragas do Mandeo.

Segundo esta orde asinada polo conselleiro de Presidencia, “se cumpren as condicións establecidas pola normativa vixente en materia de fundacións de interese galego” e, polo tanto, procédese a “clasificar de interese para a defensa do medio natural de Galicia a Fundación Fragas do Mandeo, adscribíndoa ao protectorado da Consellería do Medio Rural”.

Ademais da importancia que ten o recoñecemento oficial, esta cualificación de entidade de interese para a defensa do medio natural de Galicia é un paso máis na consecución da súa declaración como entidade de interese galego.

Esa declaración significará un estímulo para as doazóns a Fragas do Mandeo, pois poderase deducir até o 25% do importe na declaración da renda no caso dos particulares, e até o 35% no caso das empresas. Para máis detalles, podes consulta-la Ley 49/2002 de régimen fiscal de las entidades sin fines lucrativos y de los incentivos fiscales al mecenazgo ou ó teu asesor fiscal.

Con isto entran na recta final os trámites de constitución. Agora empeza o tempo de centrarmos na difusión da entidade e da custodia do territorio como instrumento para a conservación da biodiversidade na bisbarra de As Mariñas.

 
Rematados os trámites administrativos de constitución de Fragas do Mandeo e á espera de que a declaración como entidade de interese galego sexa publicada no Diario Oficial de Galicia, estamos a traballar intensamente na web.

Hoxe publicamos a segunda versión, tres meses despois da primeira. A súa principal novidade é o soporte de varios idiomas. Cando un usuario accede á web atopará a versión en galego, pero poderá escoller outro idioma. Tódolos contidos están xa traducidos ó castelán. As traducións ó inglés e alemán irán sendo incorporadas segundo vaian rematándoas os voluntarios encargados delas.

Tamén amplíase con novos contidos. A sección Hábitats recollerá pouco a pouco toda a información interesante sobre a flora, fauna e xeoloxía de As Mariñas. Na sección Misión engadíronse varias páxinas máis que explican o noso traballo e as campañas que estamos facendo.

De momento apenas hai fotografías e ilustracións, pero iranse inserindo nas vindeiras semanas.

Tecnicamente o cambio é notable, tendo levado moitas horas de programación e de redacción de contidos. Grazas ó esforzo altruísta do voluntariado, todas estas melloras non tiveron custe algún para Fragas do Mandeo.

Esperamos a túa colaboración para ila completando.

 
Naceu o día 5 de xullo, véspera da constitución da nosa entidade de custodia, preto do río Mandeo, en Aranga, onde viven os seus pais. Hoxe cumpre os tres primeiros meses de vida.

Recibiu o nome de Dona, que en galego, aparte do tratamento de respecto, é o termo para referirse a seres fantásticos femininos. Segundo ás crenzas populares, as donas eran mulleres fermosas e boas, dotadas de poderes máxicos, que habitaban as mámoas, penedos, fontes, castros e ruínas. En lingua celta significaba “valente condutora do seu pobo”. Por último, en castelán é o que propoñemos a tódolos colaborares de Fragas do Mandeo para avanzar na protección dos nosos espazos naturais.

A nai é unha cadela de raza pastor alemán, sendo o pai un boyero de Berna. Ámbolos dous proxenitores son animais fieis e intelixentes, como corresponde ás razas de cans pastores de ovellas, no caso da nai, e de vacas, no caso do pai.

Xa visitou ó veterinario para ser desparasitada, vacinada e inserirlle o microchip, que a identificará de por vida.

Nas primeiras semanas amosouse confiada e esperta, percorrendo toda a finca na que vive. Coma é habitual nos cachorros, todo lle chama a atención, sen parar de xogar e de trabar, esnaquizando todo o que colle.

A pesar da súa vitalidade, está a medrar a un ritmo de dous quilos por semana. Aprende rapidamente e xa sabe sentarse cando debe. Agora está aprendendo a comportarse cando vai da cadea e afacéndose ó balbordo das vilas.

 
Onte, venres 3 de setembro, ás 8:30 horas, presentamos Fragas do Mandeo no local da Asociación Cultural Lar de Unta. Estaba invitado un pequeno grupo de asociacións da bisbarra que xa tiñan coñecemento da nova entidade de custodia do territorio. Explica-los nosos obxectivos estaba a ser unha necesidade ante as preguntas e o interese espertado nos socios.

Leo Antelo, presidente da asociación anfitriona, presentou ós membros do padroado. Trala lectura pola nosa parte dunhas palabras nas que se expresaba a necesidade e conveniencia dunha entidade de custodia local, deuse paso ás preguntas dos asistentes e a amosa-los avances na elaboración da nova versión da web.

Esperamos poder presentar proximamente Fragas do Mandeo a un público más amplo nun acto que vaia acompañado de actividades, tales como proxeccións de fotografías e vídeos da natureza nas ribeiras do río Mandeo.

 
No día de hoxe foi asinada a escritura pública de constitución de Fragas do Mandeo, dando fe do acto o notario D. Luis Muíño. Nace a nova entidade como organización non lucrativa (ONL) e non gobernamental (ONG) de carácter fundacional, tendo como obxectivo a realización de actividades de custodia do territorio con fins de conservación da natureza no entorno da comarca coruñesa de As Mariñas (Galicia, España).

Inícianse deste xeito os trámites para a súa constitución e rexistro como entidade de interese galego ante a Xunta de Galicia.

A dotación de partida son dúas fincas valoradas en 27.595 euros e un montante económico de 3.000 euros.

Para coñecer máis detalles, descargue o documento Estatutos de Fragas do Mandeo ou consulte a sección Misión, onde atopará información sobre os nosos obxectivos e as posibilidades que ofrece a custodia do territorio como instrumento para a conservación da natureza.

© Fotos Álvaro F. Polo