Benvido – Bienvenido – Welcome – Willkommen

 
Fragas do Mandeo é unha entidade de custodia do territorio que ten como fin a preservación da biodiversidade na comarca coruñesa de As Mariñas (Galicia, España).

Coa adquisición de fincas de interese ambiental mediante compra, doazón ou legado, e a través de acordos cos propietarios de parcelas, baixo aluguer ou cesión temporal, buscamos conserva-los espazos naturais desta comarca.

Actuamos localmente, pero pensamos globalmente. Custodiámo-las fragas para veciños e visitantes, para as xeracións presentes e as vindeiras. É o noso xeito de coida-lo planeta. ¡Colabora connosco!


Menos tradescantia no Ollo da Roda

29 Setembro 2019

 
Foto dos voluntariosA última vez que estivemos traballando na reserva do Ollo da Roda localizamos un foco de tradescantia. Medraba nun lugar lamacento, onde era difícil arrincala, e ameazaba con expandirse por toda a zona húmida. Agora, tras a seca do verán, o terreo está seco. Por ese motivo hoxe achegámonos 15 voluntarios para erradicala antes de que as choivas outonais volvan a encharca-lo lugar.

Entre que ameazaba con poñerse a orballar en calquera momento e que había persoas que tiñan que marcharse pronto, os voluntarios traballaron arreo, conseguindo rematar co foco. Os resultados falan por si mesmos: foron retirados 419 kg de biomasa. Como o obxectivo era liquidar a tradescantia, non se dedicou tempo a recoller refugallos, pero aínda así o lixo pesou 42 kg, no que se incluía unha batería.

O bosque aluvial do Ollo da Roda conforma un hábitat prioritario onde prosperan os anfibios e medra unha flora especializada. Por ese motivo resulta especialmente importante evitar que sexa colonizada por especies exóticas invasoras.

Foto dos voluntarios


Unha limpeza de ríos sistemática

28 Setembro 2019

 
A oitava edición da Semana de Custodia do Territorio rematou o día 22 cunha recollida de lixo no Lambre. Foi a nosa maneira de participar na limpeza simultánea de ríos que se celebra mañá por todo o territorio galego. Nós adiantámola para que puidera formar parte do programa da Semana.

Pero non nos contentamos co logrado o pasado domingo. Así que durante estes días estivemos percorrendo os tramos de río que apadriñamos.

Limpámo-lo Mandeo dende O Tope, augas arriba da minicentral do Zarzo, até a ponte de Teixeiro. Son aproximadamente 6 km de río no que retiramos 11 kg de lixo diverso. A cifra resultou reducida porque ó longo do verán fixemos varias limpezas, necesarias pola elevada afluencia de visitantes no entorno de Chelo.

No Mendo percorremos o tramo dende a ponte das Moas até a ponte de Taibo, cunha lonxitude de aproximadamente 8 km. Recollemos 63 kg, dos que 15 kg eran lixo miúdo e o resto tres rodas, unha delas coa llanta.

Se o domingo limpamos un treito no Lambre, iniciado augas arriba da minicentral de Güimil e rematado na ponte de Fandiño, hoxe continuamos até Ponte Lambre, o que significan aproximadamente 5 km. Sumando o recollido nos dous días, foron 243 kg en total (dos que 114 kg eran lixo diverso e o resto catro rodas, dúas delas as traseiras dun tractor).

Resumindo: 317 kg de lixo retirados en 19 km de río, concentrada nos puntos máis concorridos, na contorna das pontes e nos tramos onde o leito avanza paralelo a algunha estrada.

Os resultados indican que nas limpezas iniciais recóllese moito lixo, aquel acumulado ó longo de décadas de forma dispersa ou concentrado en vellos vertedoiros incontrolados. En anos sucesivos atópase pouco e habitualmente aparece nas zonas máis frecuentadas, correspondendo a refugallos como cascos de refrescos, envoltorios plásticos de lambetadas, paquetes de tabaco, produtos de hixiene persoal, envases de produtos deportivos, etc. O certo é que, grazas á xeneralización do servizo municipal de recollida de lixo doméstico e á progresiva concienciación cidadá, cada vez se tira menos lixo ós ríos.

Todo isto foi grazas ós 18 voluntarios que percorreron os tres ríos polas dúas beiras, sumando máis de 40 km de camiñada, boa parte deles cargados co lixo recollido. O seu traballo seguirá sendo necesario, mentres a Administración non asuma que os ríos, igual que as rúas, hai que mantelos limpos.


Positiva avaliación da VIII Semana de Custodia

23 Setembro 2019

 
Rematada xa esta oitava edición, paga a pena face-lo resumen do que nela ten acontecido.

Na xornada inaugural 31 persoas escoitaron con interese a tres conferenciantes de enorme valía. Mágoa que non trouxeran boas novas respecto do futuro das catro especies que están en maior perigo de extinción na nosa bisbarra.

O Dr. Pedro Galán expuxo os resultados do seu último proxecto de investigación sobre dous dos nosos endemismos ibéricos, prognosticando que no período 2041-2070 a distribución da saramaganta vai reducirse até a metade e que lamentablemente nese mesmo período vai extinguirse en todo o planeta a lagartixa da serra. A continuación D. César Ayres informou do mal estado das poboacións galegas de sapoconcho europeo, do que non se teñen evidencias de que sobreviva actualmente na ría de Betanzos. Por último, D. Emilio Martínez explicou a situación da escribenta das canaveiras iberoccidental. Este paxariño está en grave perigo de extinción, pois soamente quedan 110 parellas en todo o mundo, 20 delas en Galicia e o resto en Portugal. Está prognosticada a súa extinción para o ano 2023, polo que é necesaria unha urxente acción conxunta entre Galicia e Portugal para evitalo. Obviamente, o reto de recupera-las poboacións locais destas catro especies está fóra da capacidade de actuación de Fragas do Mandeo, pois para iso precisaríamos dun decidido apoio institucional, situación que non se está a dar actualmente.

Na primeira xornada de voluntariado ambiental participaron 16 persoas que se desprazaron ó lugar de Chelo (Coirós) co obxectivo de erradica-lo último foco de tradescantia no tramo de 6 km de río Mandeo que apadriñamos. Non lograron rematar con el, pois está nun lugar onde a herba alta, as silvas e os arbustos dificultaron moito o traballo, pero aínda así retiraron 207 kg desta planta exótica invasora. Convocaremos unha nova xornada para eliminala definitivamente.

O día da eco-regata foi o pasado sábado. O prognóstico meteorolóxico era preocupante e seguramente desanimou a moitos. A primeira hora da tarde orballaba, o que obrigou a despregar lonas coas que cubri-la mesa na que se inscribiron 38 persoas. Partiron do porto cinco lanchas (Isamar, O Petelo, Arquider, Riandola, Chico e a pneumática Vill) con destino á ribeira dereita da ría, nun tramo no que non se recollera lixo en ningunha das cinco edicións anteriores. A zona resultou ser algo difícil, pois os baixos de esteiro non lle permitían a varias embarcacións achegarse ás zonas encomendadas. A concentración de refugallos tamén era menor que noutras ocasións, así que había que cubrir máis superficie de xuncal para enche-los sacos. Aínda así, ó final da xornada encheron un contedor industrial de 7 m3 con refugallos de todo tipo: dende unha bota de viño até a tapa dun retrete, pasando por dous tambores de lavadora, un frigorífico, un televisor, catro rodas e dúas cadeiras de cafetería. Finalmente, o tempo colaborou, os voluntarios non se mollaron e puidemos celebra-lo remate da eco-regata cunhas viandas e bebidas no porto.

A terceira actuación de voluntariado ambiental foi onte, no río Lambre. Aínda que prognosticaban choiva durante toda a mañá, os 18 participantes non se botaron atrás e percorreron o tramo medio do río, dende a ponte de Fandiño até augas arriba da central de Güimil. En realidade o treito de río no que recolleron lixo reduciuse a 2,5 km, pois non puideron andar todo o traxecto ó estar pechados varios carreiros que seguen as súas beiras. En total foron 225 kg menos de refugallos na natureza, entre os que destacaron catro rodas (dúas delas as traseiras dun tractor, estimadas en 60 kg cada unha). Así que remataron contentos dunha xornada na que gozaron dun tempo magnífico camiñando pola ribeira dun fermoso río que apenas coñecían.

A Semana de Custodia do Territorio ten a dobre finalidade de que os interesados poidan informarse asistindo á xornada de conferencias e de permitirlles colaborar en actuacións que melloren o estado dos nosos espazos naturais. Un ano máis, cumpriu os seus modestos obxectivos, coa participación de 78 persoas distintas cun total de 104 asistencias.


Traballos no observatorio de Sobrado

20 Setembro 2019

 
Un par de voluntarios visitaron varias veces a lagoa de Sobrado nos últimos meses. Alí custodiamos dúas parcelas que nos doou a Sociedade Galega de Historia Natural. Nunha delas está o observatorio ornitolóxico, polo que periodicamente temos que facerlle traballos de mantemento.

Como este inverno parte da cuberta de cobre apareceu arrincada, tivemos que instalar un par de vigas novas e repoñer toda a cuberta con pranchas de aceiro de cor verde. De paso que fixemos ese traballo, limpamos os refuxios de morcegos e as caixas niño integradas na construción, pois estaban atacadas do musgo que nelas introduciron os ferreiriños que alí aniñaron nos últimos anos. Tamén amañamos algunhas deterioracións nas fiestras, repuxémo-los enganches que permiten mantelas abertas e lavámolas, fregámo-lo interior do observatorio e incluso desmontámo-lo panel sobre a vexetación da lagoa para poder limpalo. Tamén eliminamos con alcohol unha pintada no metacrilato que protexe un dos paneis informativos interiores. Máis traballo deron as pintadas nas paredes, pois houbo que cepillar e lixa-la madeira. Dado o nivel de incivismo, non durarán moito sen que volvan a estar esborranchadas.

Por último instalamos de novo o vello cartel que alí colocou a SGHN hai máis de dúas décadas. No seu día retirámolo, para que unha voluntaria puidera restauralo na súa casa, lixándoo, vernizándoo e pintando as letras con paciencia. Houbo que poñerlle postes novos, pois os orixinais estaban totalmente podres. Agora loce como no primeiro día, lembrando unha iniciativa de custodia que foi pioneira no noso país.

Por último, tal como facemos sempre que podemos, recollémo-lo lixo nas parcelas que custodiamos, no aparcadoiro, en toda a contorna transitable da lagoa e no tramo de camiño xacobeo que pasa a carón dela.

Foron moitas horas de traballo, pero pagou a pena.


Programada a VIII Semana de Custodia

28 Agosto 2019

 
A mediados de setembro imos celebrar a oitava edición da Semana de Custodia do Territorio nas Mariñas Coruñesas e Terras do Mandeo. Igual que nas ocasións anteriores, combinaremos unha xornada de conferencias con tres de voluntariado.

Imaxe do programa da VIII Semana de Custodia do Territorio nas Mariñas Coruñesas e Terras do MandeoEsta fórmula responde ó noso compromiso coa conservación da natureza, pois ademais de informarse, tamén hai que actuar directamente no entorno se realmente queremos mellora-lo estado do noso patrimonio natural.

Este ano centrámo-lo programa na fauna que corre un maior risco de extinción na nosa bisbarra, algunha incluso en perigo crítico no conxunto do planeta. Do mesmo xeito que nas edicións anteriores, nas xornadas de voluntariado amosaremos a nosa orientación a cumprir obxectivos concretos, continuando coa mitigación local de dous graves problemas ambientais: as especies exóticas invasoras e o lixo que acaba nos ríos e no mar.

A Semana segue a estar organizada conxuntamente entre a Asociación de Desenvolvemento Rural Mariñas-Betanzos e Fragas do Mandeo. O financiamento corre totalmente a cargo da primeira, pois nós destinamos o 100 % das doazóns que recibimos a mercar montes de interese ambiental e, xa que logo, non dispoñemos de medios económicos propios para actos deste tipo.

Por favor, descarga o programa, o cartel da Semana e o cartel da eco-regata para compartilos no teu entorno persoal e redes sociais: así facilitarás que a información chegue a tódolos interesados en participar.

Para apuntarte nas actividades, por favor, ponte en contacto coa organización no teléfono 981 105 903 ou envía un correo electrónico a correo@fragasdomandeo.org cos teus datos (nome completo, DNI, data de nacemento, código postal, móbil e actividades nas que desexas participar). Deste xeito terás un seguro de accidentes, recibirás indicacións detalladas por adiantado e facilitarás a organización.

Xornada sobre a fauna en perigo de extinción: Como acto central da Semana programamos un conxunto de charlas titulado Citas coa extinción da fauna mariñán. Trala apertura a cargo da alcaldesa de Betanzos, Dª. María Barral, e do presidente da Asociación de Desenvolvemento Rural Mariñas-Betanzos, D. José Antonio Santiso, faremos un breve resumo dos logros acadados por Fragas do Mandeo nestes nove anos de andadura, nos que estivemos a traballar intensamente na restauración dos nosos bosques autóctonos e na conservación dos ríos, da marisma e das praias.

Imaxe do cartel da VIII Semana de Custodia do Territorio nas Mariñas Coruñesas e Terras do MandeoA primeira conferencia correrá a cargo do Dr. Pedro Galán, profesor e investigador da Universidade da Coruña, que nos ofrecerá os resultados do seu recentemente rematado proxecto de investigación sobre as poboacións de saramaganta e de lagartixa da serra no río Mandeo. A crise climática está a afectarlles negativamente, pois fragmenta as súas poboacións e consecuentemente reduce os intercambios xenéticos destas dúas especies consideradas oficialmente como ameazadas. A continuación intervirá D. César Ayres, da Asociación Herpetológica Española. Este herpetólogo leva estudando o sapoconcho europeo dende 1996 e formou parte do equipo redactor do plan oficial de recuperación desta especie en Galicia. Dubidamos se sigue habitando a ría, pois o último exemplar localizouse no ano 2015; xa que logo, é necesario coñece-los motivos do seu declive e as posibilidades de recuperación. Por último, D. Emilio Martínez Sabarís, anelador experto do Grupo de Anelamento Científico de Aves Anduriña, vai informarnos da situación da escribenta das canaveiras iberoccidental. Estudou as súas poboacións galegas e portuguesas entre os anos 2002 e 2009, motivo polo que o seu traballo de campo tívose en conta no plan oficial de recuperación desta especie en Galicia. Como este paxariño está en perigo crítico de extinción en todo o planeta, e a ría foi considerada zona de potencial expansión no seu plan de recuperación, debemos facer todo o posible para mellora-los seus hábitats de cría e de alimentación.
Data: Sábado 14 de setembro, de 9:30 a 14:00 horas.
Lugar: Salón Azul do Liceo de Betanzos.

Voluntariado no Mandeo: A primeira xornada de voluntariado ambiental estará dedicada a eliminar unha planta exótica invasora que despraza ás especies autóctonas das ribeiras do río Mandeo: a tradescantia (Tradescantia fluminensis). Levamos varios anos erradicando esta especie de orixe sudamericana no tramo de 6 km que apadriñamos no curso baixo do Mandeo. O obxectivo do día será suprimi-lo último foco que queda, situado no lugar de Chelo, pois ameaza con propagarse río abaixo por zonas nas que xa está erradicada. Por favor, ponte en contacto connosco previamente no caso de quereres participar. Máis datos na folla informativa.
Data: Domingo 15 de setembro, de 9:30 a 14:00 horas.
Lugar: Partiremos dende o Centro de Saúde de Betanzos.

Eco-regata na ría de Betanzos: O lixo que recollemos na marisma nas cinco edicións anteriores encheron nove contedores industriais, superando un volume total de 70 m3. Imaxe do cartel da VI Eco-regata Ría de BetanzosRematada a recollida de pneumáticos e lixo no entorno do pazo de Mariñán o ano pasado, nesta ocasión explorarémo-lo tramo final da ribeira dereita.

Animamos a toda a cidadanía a participar nesta competición lúdica na que a rivalidade será por coida-la ría. As embarcacións partirán cos equipos de voluntarios do porto de Betanzos con rumbo á ribeira próxima a Souto, onde haberá que afanarse para chegar a se-lo que máis lixo recolle e o que atope o refugallo máis singular. Á volta, no porto haberá comida e bebida.

Colaboran Amigos dos Ríos de Betanzos, Asociación Ría do Pedrido, Lar de Unta, Roxín Roxal, Casa Castillo Betanzos, Asociación Porta da Vila e Club de Remo Olímpico do Mandeo. Tamén colaboran o concello de Betanzos, Protección Civil e comercial Vicente de la Fuente. Ponte en contacto connosco se queres participar, aínda que non teñas lancha. Máis datos na folla informativa.
Data: Sábado 21 de setembro, de 16:00 a 20:00 horas.
Lugar: Porto de Betanzos.

Limpeza simultánea de ríos: Este ano é a duodécima edición da limpeza simultánea de ríos de toda Galicia que coordina o Proxecto Ríos. Para nós será a séptima edición na que colaboraremos (farémolo unha semana antes da xornada oficial por razóns organizativas). O ano pasado participamos 861 persoas de 70 entidades, retirando máis de 10 toneladas de refugallos en tramos de ríos de 53 concellos galegos. Este ano volveremos ó río Lambre para continuar recollendo canto lixo atopemos no tramo medio do río, augas arriba da desembocadura do rego do Anido, continuando a limpeza iniciada no 2018. Serán 2,5 km de percorrido por un bosque diverso que merece ser coñecido e conservado. O traxecto non é dificultoso, pero convén vestir botas de auga e roupa axeitada para andar polo monte, ademais de levar luvas. Por favor, ponte en contacto connosco previamente no caso de quereres participar. Máis datos na folla informativa.
Data: Domingo 22 de setembro, de 9:30 a 14:00 horas.
Lugar: Partiremos dende o Centro de Saúde de Betanzos.

A Semana de Custodia é un evento consolidado, único na bisbarra, na que se proporciona ás persoas preocupadas polo patrimonio natural da nosa comarca a oportunidade de actuar de xeito directo, eficaz e coordinado na súa conservación.

Non basta con opinar ou participar nas redes sociais para recupera-lo noso patrimonio natural. ¡Hai que actuar!


Rematou o campo de traballo

26 Agosto 2019

 
Foto dos voluntariosOs voluntarios da cuarta edición do campo de traballo Monte da Espenuca aproveitaron o día de hoxe para arrincar as últimas tradescantias e crocosmias a carón das fervenzas que forma o rego das Bouzas. Mañá marcharán ós seus lugares de orixe, levando como bagaxe as novas experiencias.

Nós achegámonos para despedirnos deles e agradecerlles o traballo feito, garantíndolles que vixiaremos que estas especies exóticas invasoras non recolonicen as zonas onde as eliminaron. E tamén para pedirlles que sigan comprometéndose coa conservación da natureza nos seus lugares de orixe mediante accións directas no entorno natural, colaborando con entidades como a nosa.

Cargamos o remolque con tódolos sacos cheos de restos vexetais e de refugallos. Foron 500 kg exactos de biomasa e 52 kg de lixo. O peso das invasoras arrincadas foi inferior a anos anteriores, pero o traballo foi realmente positivo, pois limparon un tramo longo do regato nunha zona moi escarpada, onde o relevo dificultaba o traballo.

Foto do rego das BouzasAínda permanecen varios focos de invasoras e de lixo no tramo do rego das Bouzas que falta até chegar á ponte do Porto do Vao, na estrada a Espenuca.

Os afluentes do río Mandeo, aínda que sexan os pequenos regatos que como este quedaron fóra do espazo natural protexido, teñen unha gran importancia ecolóxica. Neles atopan refuxio os alevíns mentres non acadan o tamaño conveniente para baixar ó río. Ademais, no seu entorno podemos atopar varias especies ameazadas: anfibios como a saramaganta e a ra dos regos, moluscos como o caracol de Quimper ou fentos como o Trichomanes speciosum.

Atendendo á necesidade de restaurar o estado natural do rego das Bouzas, esperamos que poidan continuarse estas actuacións en futuras edicións do campo de traballo. Confiamos en seguir contando coa boa xestión do seu director, Jesús Díaz, e de Ribeirán Proxectos Naturais, sendo imprescindible a colaboración do Concello de Coirós e da Dirección Xeral de Xuventude, Participación e Voluntariado da Xunta de Galicia.

Foto dos voluntarios


Benvida ó cuarto campo de traballo

17 Agosto 2019

 
Esta mañá estivemos no Centro Etnográfico de Teixeiro para darlles a benvida ós voluntarios da cuarta edición do campo de traballo Monte da Espenuca.

Foto dos voluntariosTrece persoas procedentes de toda España, incluídas tres galegas, acompañadas de dous monitores e do director do campo, traballarán en favor do noso patrimonio natural até o día 27 de agosto. Na charla de benvida tivemos a ocasión de expoñerlles as actuacións de restauración de hábitats que temos realizado, cales son os nosos obxectivos e como empregamos a custodia do territorio para conserva-la biodiversidade da nosa bisbarra.

Durante seis xornadas van sumar 480 horas de traballo á labor realizada polos voluntarios das dúas últimas edicións no rego das Bouzas. Este afluente do Mandeo desemboca xusto ó pé do Centro de Interpretación de Chelo (Coirós). Nel medran varios focos de tradescantia (Tradescantia fluminensis).

Ademais de despraza-la vexetación autóctona nas beiras deste regato, a presenza nelas desta invasora de orixe sudamericana supón o risco de que as enchentes invernais arrastren restos que poden chegar a prender dentro do espazo natural protexido, onde estamos preto de lograr erradicala en todo o tramo de ribeira do río Mandeo que apadriñamos. Como apoio nese obxectivo, durante o inverno e a primavera, voluntarios de Fragas do Mandeo estiveron revisando as zonas de actuación das edicións anteriores para impedir que a tradescantia as recolonizara.

Fragas do Mandeo promove, asesora e colabora con este campo de traballo. Solicitado polo Concello de Coirós, está organizado pola Dirección Xeral de Xuventude, Participación e Voluntariado da Xunta de Galicia. A xestión corre a cargo de Ribeirán Proxectos Naturais, contando con Jesús Díaz como director.

Agradecémoslles en nome da natureza o seu esforzo altruísta.

Foto dos voluntarios


Voluntariado no Mandeo

25 Xullo 2019

 
A primeiros do mes pasado achegámonos cun grupo de voluntarios da empresa Naturgy ó Mandeo para eliminar dúas especies exóticas invasoras, a tradescantia e a cala, que medraban ó redor do edificio abandonado a carón da minicentral do Zarzo. Malia que retiramos 138,5 kg de biomasa, non chegou a mañá para erradicar toda a tradescantia. Así que programamos unha nova xornada para o primeiro domingo de agosto co obxectivo de acabar con ela.

Foto dos voluntariosComo habitualmente, o punto de encontro será o Centro de Saúde de Betanzos, onde compartiremos vehículos. Non te preocupes polas ferramentas, pero procura levar uns protectores para os xeonllos, unhas luvas finas, vestir roupa e calzado axeitados para traballar no monte, e non esquezas algo de picar e de beber para cando fagámo-lo descanso a media mañá.

Nesta xornada acabaremos cun dos dous últimos focos de tradescantia nos aproximadamente 6 km de río entre O Tope e a ponte de Teixeiro. Se te animas a axudar a libera-lo Mandeo de invasoras, apúntate a esta xornada de voluntariado enviándonos con antelación os teus datos (nome completo, DNI, data de nacemento e móbil). Así poderemos notificarche cambios de última hora, facerche un seguro de accidentes e nos facilitarás a organización. Na sección Contacto atoparás a información necesaria.

Punto de encontro: Centro de Saúde de Betanzos.
Data: Domingo, 4 de agosto de 2019.
Hora: Sairemos ás 9:30 e volveremos ás 14:00 horas.

Post data: Os 10 participantes nesta xornada lograron o obxectivo de acabar con este foco de tradescantia. Revisaron concienciudamente toda a zona para elimina-las plantas na zona que quedara pendente na xornada anterior, pero tamén repasaron o resto da área para retirar brotes que non foran detectados. En total retiraron 45 kg de restos de tradescantia e unha cala.


Volvemos á reserva do Catorce

21 Xullo 2019

 
Na anterior xornada de voluntariado quedara pendente de remata-la eliminación da xunca olorosa (Cyperus eragrostis) na zona húmida da reserva de anfibios. Esta mañá, quince voluntarios acometeron o reto. Aproveitaron a temperatura agradable, pero atoparon o chan completamente seco, polo que era máis difícil arrinca-las plantas.
Foto dos voluntarios

A decisión e o traballo sistemático levaron a que avanzáramos a bo ritmo. Tamén localizamos algúns exemplares de eixerón (Conyza canadensis) e de áster americano (Aster squamatus) que pasaron desapercibidos na xornada anterior. En total xuntamos unha biomasa de aproximadamente medio metro cúbico.

Malia a efectividade do traballo realizado, non podemos dar por erradicadas definitivamente estas especies. Teñen unha gran capacidade de recolonización, tanto grazas ó banco de sementes do chan como pola alta capacidade de dispersarse arrastradas polo vento. En todo caso, como xa temos comprobado en anos anteriores, aínda que reaparezan será con densidades moito menores.

A xornada rematou cunha comida campestre na que os voluntarios compartiron viandas e conversaron animadamente.


Xornada de voluntariado na reserva do Catorce

7 Xullo 2019

 
Hoxe achegámonos unha ducia de voluntarios á reserva de anfibios do Catorce (Coirós). Coa calor, o nivel da auga tiña baixado moito, polo que era o momento axeitado para face-los traballos de mantemento sen risco de afectar ós anfibios. Tamén era unha oportunidade para que os voluntarios coñeceran as últimas actuacións na reserva, incluídos os murais pintados nas paredes exteriores do refuxio de visitantes e do refuxio de morcegos.

Foto dos voluntariosDestinámo-la mañá a eliminar varias especies exóticas invasoras. Unhas semanas antes, un voluntario estivo controlando tódolos rebrotes dos eucaliptos nas dúas hectáreas de bosque. Pero faltaba elimina-las plantas invasoras que reapareceron no resto da reserva. Retiramos bastante eixerón (Conyza canadensis); afortunadamente naceu pouco áster americano (Aster squamatus) e soamente localizamos un pé de herba do asno (Oenothera glazioviana). No caso da xunca olorosa (Cyperus eragrostis), escaseaba nos puntos onde eliminámo-la o ano anterior, pero era abondosa no resto da zona húmida. En total retiramos medio metro cúbico de biomasa.

Aínda que non logramos acabar coa xunca olorosa, os voluntarios emprazáronse a volver tan pronto como fora posible para remata-lo traballo.
Foto dos voluntarios


Uso de cookies: Este sitio web emprega cookies para mellora-la experiencia de usuario. Se continúa navegando consente a aceptación de ditas cookies e acepta a nosa política de cookies (se pincha no enlace obterá máis información).