Benvido – Bienvenido – Welcome – Willkommen

 
Fragas do Mandeo é unha entidade de custodia do territorio que ten como fin a preservación da biodiversidade na comarca coruñesa de As Mariñas (Galicia, España).

Coa adquisición de fincas de interese ambiental mediante compra, doazón ou legado, e a través de acordos cos propietarios de parcelas, baixo aluguer ou cesión temporal, buscamos conserva-los espazos naturais desta comarca.

Actuamos localmente, pero pensamos globalmente. Custodiámo-las fragas para veciños e visitantes, para as xeracións presentes e as vindeiras. É o noso xeito de coida-lo planeta. ¡Colabora connosco!


Crowdfunding para coida-la nosa ría

16 Maio 2022

 
Hoxe lanzamos unha campaña de recollida de fondos que ten como finalidade chegar a ser máis eficaces na retirada de lixo e na eliminación de especies exóticas invasoras ó longo da marisma da ría de Betanzos.

Dende hai anos vimos realizando recollidas masivas de lixo nela, tendo organizado seis edicións da eco-regata, obtendo resultados salientables (en total retiramos máis de 70 metros cúbicos de lixo). Nunhas ocasións limpamos concentracións de refugallos en puntos da xunqueira facilmente accesibles dende terra firme; noutras, empregamos lanchas usadas na festa fluvial dos Caneiros para navegar por augas suficientemente profundas até onde era factible desembarcar.

Pero agora chegou o momento de limpa-lo resto das zonas. Para iso precisamos adquirir unha embarcación tipo zodiac, pero de casco ríxido para evitar cortes causados por calquera vidro roto, que poida navegar polas canles da xunqueira e permitirnos desembarcar en puntos con pouco calado, sen ter que preocuparnos da marea.

Contamos cunha axuda pública para mercala, pero non cubre o 100 % do importe. Esta campaña é para xuntar o que falta até a totalidade do prezo da embaración, do motor, dos aparellos necesarios e do remolque. Soamente imos mercala se a campaña financia todo o que falta, pois non imos toca-los cartos destinados a adquirir parcelas que recibimos dos nosos doadores.

No vídeo da campaña explicamos con todo detalle a necesidade desta adquisición. Podes ve-los avances deste crowdfunding e ―no caso de que te animes― facer unha achega a través da plataforma Migranodearena. Por certo, lembra que emiten un certificado para deducir na declaración da renda de até o 80 % do que does.

Con pequenas axudas de moitos, podemos facer grandes cousas.


Intensa fin de semana

8 Maio 2022

 
Onte estivemos na praia da Alameda (Miño) retirando biomasa de invasoras, para o que contamos coa axuda dun grupo de voluntariado ambiental da Dirección Xeral de Xuventude, Participación e Voluntariado da Xunta de Galicia, formado por 16 persoas, acompañadas por dous monitores de Ribeirán Proxectos Naturais.

Foto dos voluntariosO ano pasado iniciámo-la eliminación dos álamos brancos que invadían a zona húmida da trasduna, mediante un descortizado na base do tronco no período máis seco do ano, tediosa tarefa que supuxo un esforzo equivalente a 11,6 xornadas de traballo de 8 horas. Tras esperar varios meses a que secaran, xa tiña chegado a hora de retirar toda a súa biomasa; así pois o venres fomos cortalos.

Onte, axudados por estes voluntarios, enchemos até os topes un contedor de 12 m3 coa leña de máis de 267 árbores (sen contar os máis pequenos, pois xa se confundían coas pólas cortadas). Aínda así queda traballo pendente, polo que na próxima ocasión teremos que contratar un contedor máis grande.

Foto dos voluntariosHoxe fomos ó monte da Espenuca (Coirós), onde o grupo de voluntariado sumouse á xornada programada para este día co obxectivo de recoller lixo, polo que en total participamos 21 persoas. E aínda poderiamos engadir outra máis, pois o condutor do microbús contratado tamén botou unha man.

Enfrontabámonos cunha tarefa difícil, pois os refugallos a retirar eran pesados, estaban nunha zona que ten unha pendente do 76 % e había que arrastralos até o cumio, situado a 100 metros de distancia. O máis problemático era subir pola ladeira os restos dun vehículo alí ciscado, pois na anterior limpeza foinos imposible retira-lo motor, o eixo dianteiro e as súas dúas rodas. Desta vez lográmo-lo, pois días antes despezámolos, aínda que costou o seu subi-lo motor. Tras pesar todo o recollido na báscula, sumamos un total de 309,95 kg.

Esperamos que, ademais do cansazo, estes voluntarios lembren os esforzos desta fin de semana co orgullo de saber que actuaron en favor da natureza dunha forma realmente eficaz e do moito que pode lograrse cando se traballa en equipo.

Foto dos voluntarios

 
Foto da portadaPost data: O xestor de residuos informounos de que, na praia da Alameda, a biomasa coa que enchemos o contedor pesou 880 kg.

Por outra banda, a actuación na Espenuca foi noticia central da portada do xornal La Opinión Coruña do día 12 de maio. Na edición do día seguinte tamén publicaron unha alusiva viñeta do humorista gráfico Santy Gutiérrez.

Esperemos que esta difusión motive a máis persoas a comprometerse coa natureza, participando nas nosas xornadas de voluntariado ou con calquera outra entidade que traballe con eficacia para mellorar o estado dos nosos espazos naturais.

A natureza precisa de axuda; canta máis, mellor.

Viñeta


Un traballo pendente na Espenuca

27 Abril 2022

 
O pasado 6 de febreiro retiramos no monte da Espenuca unha lavadora, un televisor, un pequeno sofá e outros refugallos que pesaron un total de 273 kg. Tamén a metade dun vehículo. Pero quedounos a outra metade, pois non fomos capaces de desmontala, resultando imposible subila enteira a causa da elevada pendente da ladeira.

Foto dos voluntariosOnte un par de voluntarios estiveron seccionando as distintas partes para que poidamos subilas por separado. Xa que logo, intentarémolo o domingo día 8 de maio. Con esta nova xornada de voluntariado buscamos manter limpa a única cara do monte na que se conserva o bosque autóctono.

O traballo será sinxelo, pois consistirá en que a meirande parte dos participantes permanezan no cumio do monte tirando dunha corda, mentres un par de persoas baixarán a encher a saca atada no outro extremo e logo dirixila costa arriba. Como o motor pesa bastante, precisamos xente de abondo.

Para evita-los riscos de contaxio, non relaxaremos as medidas de protección. Limitarémo-las prazas e tódolos participantes terán que leva-la súa propia máscara sanitaria e as súas luvas. O punto de encontro será o propio miradoiro. Non fai falla levar ferramentas, pero é recomendable vestir calzado axeitado para internarse no monte. Non esquezas algo de picar e de beber para cando fagámo-lo descanso a media mañá.

Se queres apuntarte, envíanos con antelación os teus datos (nome completo, DNI, data de nacemento, móbil e concello de residencia). Así poderemos notificarche cambios de última hora, facerche un seguro de accidentes e facilitarasnos a organización. Na sección Contacto atoparás a información necesaria.

Punto de encontro: Miradoiro da Espenuca (Coirós).
Data: Domingo, 8 de maio de 2022 (orixinalmente programada para o día 1, adiamos unha semana esta xornada por varias circunstancias).
Hora: Empezaremos ás 9:30 e remataremos ás 14:00 horas.

A Deputación da Coruña financiará nun 80 % os seguros de voluntariado.


De novo no río Mendo

10 Abril 2022

 
Pasados sete días dende a última actuación no río Mendo, volvemos hoxe para continuar retirando lixo e de paso elimina-las especies exóticas invasoras que atopáramos.

Foto dos voluntariosNesta xornada de voluntariado centrámonos nun foco de lixo que tiñamos localizado nas proximidades da ponte das Moas. Tal como pasa habitualmente, aparentaba ser máis pequeno do que resultou ser, pois os refugallos estaban parcialmente ocultos por capas de follas caídas durante anos. Xunto co lixo, había un par de pequenos focos de crocosmia, unha flor que aparece frecuentemente nos vertedoiros incontrolados nos que botaron restos de xardinería. Tras rematar co foco, percorremos un tramo da senda entre a ponte das Moas e a da Ermida, onde apareceron moi poucos refugallos e tamén moi poucas invasoras.

Finalmente, os seis participantes lograron retirar un total de 226,6 kg de lixo, 292 tubérculos de crocosmia e unha acacia negra.

No que levamos de ano xa temos retirado nos espazos naturais da nosa bisbarra máis dunha tonelada de lixo e pronto alcanzaremos a media tonelada de biomasa de especies exóticas invasoras.

A Deputación da Coruña financiará nun 80 % os seguros de voluntariado.


Coidando o río Mendo

3 Abril 2022

 
Onte iniciamos a revisión dos ríos correspondente ó segundo trimestre, recollendo lixo e retirando especies exóticas invasoras nos tramos que custodiamos. Empezamos polo treito do río Mendo entre a ponte dos Cabalos e a da Ermida, onde atopamos moi poucas invasoras, resultado previsible tendo en conta os periódicos repasos que facemos. A súa biomasa pesou 2,2 kg, composta de crocosmia e de tradescantia. O lixo pesou 13,4 kg, sendo o máis destacado unha roda que estaba somerxida, localizada grazas a que o río leva pouca auga.

Foto dos voluntariosPara esta mañá programamos unha xornada de voluntariado, na que participaron nove persoas. Había que retirar unha roda de tractor ciscada ladeira abaixo, pero que afortunadamente non deu chegado ó río. Equipados cunha roldana e con cordas, puidemos arrastrala ladeira arriba malia a elevada pendente. Tras recoller o lixo no entorno do viaduto, desprazámonos ó entorno da ponte da Ermida, onde tiñamos localizado un pequeno vertedoiro. Finalmente, o balance da xornada foron 268,5 kg de lixo.

O bo estado ecolóxico dos nosos espazos naturais soamente pode lograrse con accións periódicas de voluntariado como as desta fin de semana. ¡Anímate a participar!

A Deputación da Coruña financiará nun 80 % os seguros de voluntariado.


Limpeza da praia Grande de Miño

26 Marzo 2022

 
Esta mañá un grupo de trece persoas limparon a praia Grande de Miño. Percorreron todo o areal de punta a punta e dende a estrada até o mar, recollendo sistematicamente tódolos refugallos, incluso rebuscando entre a vexetación dunar para que non quedara absolutamente nada. En total retiraron 216,15 kg de lixo.

Foto dos voluntariosEsta coidadosa limpeza tamén permitiu localizar dous incipientes focos de especies exóticas invasoras, un de crocosmia e outro de uña de gato. Non chegou a un quilo a biomasa retirada, pero a pronta intervención evitou que se expandiran. É a vantaxe de actuar simultaneamente ante o lixo e ante as invasoras.

A iniciativa partiu da empresa do sector da moda NWHR, que se puxo en contacto connosco para que organizáramos unha xornada de voluntariado destinada ós seus simpatizantes e traballadores. Con esta actuación queren compensar o ineludible impacto ambiental que, como calquera outra actividade industrial, supón o sector téxtil, incluso cando a responsabilidade ambiental está na mesma cerna da empresa, como é neste caso. Por iso agradecémoslle o seu compromiso, colaborando connosco no mantemento do patrimonio natural da nosa bisbarra.

A Deputación da Coruña financiará nun 80 % os seguros de voluntariado desta xornada.


Coirós recoñece o noso traballo

12 Febreiro 2022

 
Esta mañá o Concello de Coirós entregou as axudas anuais ás entidades activas no seu termo municipal, sendo a nosa unha das beneficiarias. Sen dúbida é un recoñecemento do traballo que levamos feito nos últimos anos, onde poden destacarse os avances na recuperación da Espenuca ou a creación da Reserva de Anfibios do Catorce.

Foto da entrega da subvenciónA meirande parte das subvencións ―tanto públicas como privadas― son finalistas, pois están ligadas a proxectos concretos, e aínda así habitualmente non cobren a totalidade dos orzamentos. Por ese motivo, as axudas non finalistas como esta son fundamentais para a nosa entidade, pois permiten sufragar outros gastos ineludibles e incluso complementar aquelas subvencións ligadas a proxectos recibidas doutros organismos. Grazas a elas poderemos seguir destinando a integridade das colaboracións privadas a mercar parcelas de alto valor ambiental.

Agradecemos ó Concello de Coirós o seu continuado apoio, que se remonta ó ano 2015, cando asinámo-lo primeiro convenio de custodia do territorio.


Voluntariado na Espenuca

3 Febreiro 2022

 
O próximo domingo, día 6, imos achegarnos ó miradoiro da Espenuca cun dobre obxectivo: gozar das vistas recuperadas e recoller lixo.

Foto do cartel nas tenzasTras décadas nas que os eucaliptos cegaban totalmente a panorámica divisable dende o miradoiro, celebraremos que de novo podemos gozar dela ―aínda que sexa só parcialmente― grazas ó traballo que estivemos realizando nas cinco tenzas que temos mercado.

Unha vez expliquémo-las duras condiciones nas que eliminamos os eucaliptos, procederemos a recoller todo o lixo que atopemos. Na aba noroeste do monte hai moitos refugallos, a causa de que visitantes incívicos optan por desfacerse deles guindándoos no medio do bosque. Máis difícil nos será retirar unha lavadora e un vehículo chimpados ladeira abaixo, para o que será preciso usar cordas.

Para evita-los riscos de contaxio, non relaxaremos as medidas de protección. Limitarémo-las prazas e tódolos participantes terán que leva-la súa propia máscara sanitaria e as súas luvas. O punto de encontro será o propio miradoiro. Non fai falla levar ferramentas. No miradoiro a recollida será sinxela, pero é recomendable un bastón e calzado axeitado para internarse na aba. Non esquezas algo de picar e de beber para cando fagámo-lo descanso a media mañá.

Se queres apuntarte, envíanos con antelación os teus datos (nome completo, DNI, data de nacemento, móbil e concello de residencia). Así poderemos notificarche cambios de última hora, facerche un seguro de accidentes e facilitarasnos a organización. Na sección Contacto atoparás a información necesaria.

Punto de encontro: Miradoiro da Espenuca (Coirós).
Data: Domingo, 6 de febreiro de 2022.
Hora: Empezaremos ás 9:30 e remataremos ás 14:00 horas.

Post data: Unha vez que explicamos ós nove participantes da xornada o traballo que levamos feito no cumio da Espenuca, e o que aínda queda por facer, puxémonos a retira-lo lixo na zona. Para subi-lo ciscado na aba noroeste, tivemos que usar longas cordas a causa da elevada pendente. O balance foi de 273 kg, incluíndo voluminosos como unha lavadora, un televisor, un pequeno sofá e a metade dun vehículo. Quedounos por subi-lo motor e o eixo dianteiro coas súas dúas rodas, pero xa o faremos noutra ocasión.

A Deputación da Coruña financiará nun 80 % os seguros de voluntariado.


A Espenuca mira de novo a Chelo

28 Xaneiro 2022

 
Onte e máis hoxe, seis persoas estiveron traballando duramente para recuperar parcialmente as espectaculares vistas que en tempos había dende A Espenuca: agora pode verse de novo o lugar de Chelo e o curso baixo do río Mandeo.

Foto das vistasNo mes de outubro iniciámo-la primeira fase da eliminación dos eucaliptos nas tenzas que temos mercado no cumio do monte da Espenuca. Para esta segunda fase precisabámo-la colaboración de profesionais experimentados. Había que corta-los enormes eucaliptos ―grosores de até 75 cm e alturas que acadaban os 27 metros― que deixáramos para esta fase, pero sen dana-los poucos érbedos, loureiros, carballos e castiñeiros que sobrevivían baixo eles. Todo elo nunha aba de acusada pendente (76 % de media), salpicada de perigosos salientes rochosos. Vendo os escasísimos danos causados ó arborado autóctono, a cualificación destes profesionais quedou máis que demostrada.

No frío amencer destes días soleados, o xogo das néboas que se demoran no val do Mandeo é moi fermoso. Aínda que o traballo ten sido moi duro, a satisfacción é enorme.

Pero o traballo non rematou, pois aínda nos quedan por eliminar os eucaliptos na parte baixa das parcelas, inicia-la reforestación con arborado autóctono procedente do noso viveiro e, cando chegue o seu tempo, controlar manualmente os rebrotes dos eucaliptos até que sequen definitivamente. ¡A recuperación desta fraga non é un traballo doado!


Erradicando a tradescantia no Mandeo

21 Xaneiro 2022

 
Nestas primeiras semanas do ano a loita contra as especies exóticas invasoras estivo centrada na tradescantia. Hoxe rematámo-lo repaso invernal do río Mandeo, no tramo entre O Tope e a ponte de Teixeiro, así como no seu afluente o rego das Bouzas.

Foto da tradescantiaNesta época do ano é fácil detecta-la presenza de invasoras, pois non logran quedar ocultas entre a vexetación autóctona, totalmente murchada polo frío. En total retiramos 128,5 kg de biomasa de tradescantia, ademais de desenterrar 251 tubérculos de crocosmia e arrincar dúas acacias negras, unha hortensia e un ligustro asiático.

A tradescantia é a invasora que actualmente está a darnos máis traballo. Obriga a repasos continuados, cada vez máis exhaustivos, tratando de arrincala con extremo coidado para non deixar o máis mínimo anaco. Dos seis focos no río Mandeo, soamente demos por erradicado un, aínda que os demais están moi diminuídos. No rego das Bouzas prodúcense máis rebrotes, a causa dos numerosos focos existentes e porque aínda non se eliminou augas arriba dos muíños. Sumado a todo isto, dáse a circunstancia de que esta invasora ten aproveitado que a situación sanitaria dos últimos dous anos limitounos dedicarlle todo o tempo que precisa.


Uso de cookies: Este sitio web emprega cookies para mellora-la experiencia de usuario. Se continúa navegando consente a aceptación de ditas cookies e acepta a nosa política de cookies (se pincha no enlace obterá máis información).