Premian o noso traballo

12 Febreiro 2019

 
Logo da Fundación NaturgyA Fundación Naturgy vén de recoñece-lo noso traballo outorgando o premio Emprendedores Sociais ó noso proxecto Custodiando o bosque atlántico no río Mandeo.

A finais do ano pasado a Fundación Naturgy convocou a primeira edición deste premio, creado co obxectivo de que os empregados da compañía impulsen aqueles proxectos sociais e ambientais, promovidos por organizacións españolas sen ánimo de lucro en calquera dos países nos que opera a compañía, relacionados coa eficiencia enerxética, o medio ambiente e a vulnerabilidade enerxética.

Foto da sinatura do convenioO proxecto gañador foi presentado por unha persoa que coñece ben a nosa traxectoria, D. Ignacio Aparicio, pois dende hai anos acude sempre que pode ás nosas xornadas de voluntariado acompañado da súa muller e os seus dous fillos. “Fragas do Mandeo fai unha gran labor e este premio axudará moito. Cando chegas a un monte meses despois de ter traballado nel e contemplas como se vai rexenerando, é un orgullo e dá esperanza de que aínda podemos cambia-lo mundo a mellor”, segundo as súas propias palabras.

Coa sinatura esta mañá do convenio, a Fundación Naturgy colaborará connosco na sensibilización e implicación de forma directa da cidadanía na salvagarda do patrimonio natural da comarca de As Mariñas, de xeito que os veciños se vinculen emocionalmente cos espazos naturais locais, os valoren e os protexan. Ademais deste apoio, o premio significa para nós un respaldo moral ó traballo continuado que levamos realizando dende hai oito anos, polo que nos sentimos moi honrados coa súa concesión.


A Universidade Sénior visita a reserva do Catorce

9 Febreiro 2019

 
Esta tarde acompañamos a un grupo de 33 persoas da Asociación de Alumnos e Ex-alumnos da Universidade Sénior da Coruña (ADAYEUS) na súa visita á reserva de anfibios do Catorce.

Foto da visitaDurante a mañá realizaron unha camiñada polo concello de Coirós. Percorreron o monte do Gato, visitando os petróglifos da fonte do Oso e subindo ó pico da Felga, e logo seguiron a ruta dos muíños do río Vexo, en Xora. Pola tarde achegáronse á reserva, podendo coñecer como foi que a creamos, os traballos realizados e os obxectivos acadados, para finalmente introducirse na bioloxía dos anfibios observando algunhas postas de ras.

A razón primordial da creación da reserva foi garantir un hábitat axeitado para a reprodución das poboacións locais de anfibios. A divulgación ambiental en visitas como esta é compatible coa conservación do espazo e redunda nunha maior concienciación da sociedade na importancia de preserva-los puntos de reprodución deste grupo de vertebrados tan ameazado.


Primeira adquisición do ano

24 Xaneiro 2019

 
Fotografía do título de propiedadeHoxe pasamos pola notaría de D. Óscar Manuel López Doval en Betanzos para asina-la escritura de compravenda da primeira parcela que adquirimos este ano.

Con esta nova incorporación ampliamos a superficie da reserva do Ollo da Roda en 746 m2. Pode parecer pouca extensión, pero permítenos eliminar un eucaliptal nun tramo de río no que xa estamos custodiando varias parcelas contiguas. Deste xeito poderemos darlles ó bosque e ós prados de ribeira a continuidade que interrompía a masa de eucaliptos, entre os que tamén se mesturaba algunha robinia.

Rematados os traballos na reserva do Catorce, esperamos recupera-lo ritmo de compra de parcelas de alto interese ambiental en zonas onde o seu escaso rendemento forestal nos permita adquirilas a prezos económicos.

De novo temos que agradecerlles ós nosos doadores a súa xenerosidade. ¿Non te animas a ser un deles? Calquera achega será benvida.


Xornada de voluntariado para despedi-lo ano

28 Decembro 2018

 
Como continúa o bo tempo, o próximo domingo día 30 despedirémo-lo ano cunha xornada de voluntariado na praia Grande de Miño.

Foto de yucaApadriñamos este areal dende marzo de 2015, cando iniciámo-la rexeneración ecolóxica do seu sistema dunar como parte da nosa campaña Litoral. Daquela erradicamos varios focos de 7 plantas exóticas invasoras. Dende entón xa aumentamos a 11 o número de especies distintas que temos ou ben erradicado totalmente ou ben reducido as súas poboacións notablemente.

Na xornada deste domingo percorreremos as dunas para localiza-los focos que teñan rexurdido, ou os exemplares de novas especies exóticas, para erradicalos. Igual que en ocasións anteriores, retiraremos todo o lixo que atopemos no sistema dunar. O obxectivo final é avanzar na recuperación da súa delicada vexetación, moi afectada polo elevado número de visitantes que soporta no verán.

Como sempre, o punto de encontro será o Centro de Saúde de Betanzos, para compartir vehículos (os que vaian directamente deben avisarnos para non esperalos inutilmente). Non te preocupes polas ferramentas, pero lembra que é conveniente levar unhas luvas e vestir roupa axeitada para traballar. Foto dos voluntariosNon esquezas algo de picar e de beber para cando fagámo-lo descanso a media mañá.

Se queres participar nesta última xornada de voluntariado ambiental do ano, envíanos con antelación os teus datos (nome completo, DNI, data de nacemento e móbil). Así poderemos notificarche cambios de última hora, facerche un seguro de accidentes e facilitarasnos a organización. Na sección Contacto atoparás a información necesaria.

Punto de encontro: Centro de Saúde de Betanzos.
Data: Domingo, 30 de decembro de 2018.
Hora: Sairemos ás 9:30 e volveremos ás 14:00 horas.

Foto de lixoPost data: Obxectivo cumprido. Os 11 voluntarios que participaron nesta xornada limparon e eliminaron invasoras en toda a praia Grande de Miño. O lixo recollido pesou 185 quilos, ós que hai que sumar 39 quilos de biomasa de 6 especies exóticas invasoras. Entre elas figuran dúas especies que xa erradicaramos pero que reapareceron: unha ramiña de uña de gato (Carpobrotus edulis) que tiña logrado enraizar e unha pequena planta de yuca (Yucca gloriosa). O resto son especies con gran capacidade de dispersión que eliminamos en ocasións anteriores: eixerón (Conyza canadensis), áster (Aster squamatus) e cyperus (Cyperus eragrostis), ás que engadimos desta vez o té americano (Bidens aurea).


Charla en Oza dos Ríos

21 Decembro 2018

 
Esta mañá acudimos á casa consistorial de Oza dos Ríos para dar unha charla no Obradoiro de Emprego Activa III Oza-Cesuras-Coirós, invitados pola súa directora, Marian Rodríguez.

Foto da charlaA edición deste ano está centrada en forma-los asistentes en actividades auxiliares de conservación e mellora de montes, polo que o mestre especialista forestal do curso, Miguel Ángel Franco López, propuxo a incorporación desta charla no programa formativo. Os dez alumnos escoitaron con atención a exposición do noso punto de vista, no que a xestión do monte debe contemplar, paralelamente á súa explotación económica, a conservación da súa biodiversidade.

Incidimos especialmente nas técnicas de eliminación de eucaliptos nas zonas de monte que deben destinarse a bosque autóctono e na erradicación de especies exóticas invasoras. Igualmente comentamos a necesidade de considera-la conservación da natureza como unha fonte de riqueza e de emprego, malia que na nosa bisbarra aínda non se teña explorado esta posibilidade do mesmo xeito que teñen feito noutras comunidades e países.


Última xornada de voluntariado na reserva do Catorce

18 Decembro 2018

 
Para o próximo domingo día 23 temos programada a última xornada de voluntariado na reserva de anfibios do Catorce deste ano, aproveitando os prognósticos meteorolóxicos favorables. A xornada tamén servirá para amosa-lo resultado das últimas actuacións, vela con moita auga e observa-las primeiras postas de anfibios. E por último, pero non menos importante, para compensar á natureza polo consumismo desenfreado destas datas.

Foto dunha posta de anfibiosDende agosto, os voluntarios estiveron traballando para des-eucaliptizar as dúas hectáreas de monte da reserva. Agora toca darlle un repaso ós rebrotes dos eucaliptos, para que a humidade invernal acabe podrecéndoos. O traballo consistirá en corta-los rebrotes e danar severamente os cepos coa axuda de machados e pulaskis.

Como habitualmente, o punto de encontro será o Centro de Saúde de Betanzos, para compartir vehículos. Como seguramente non cheguen as ferramentas para todos, se podes, leva unha macheta. Lembra que é conveniente levar unhas luvas de coiro e vestir roupa axeitada para andar polo monte no inverno. Non esquezas algo de picar e de beber para cando fagámo-lo descanso a media mañá.

Se queres participar na des-eucaliptización da reserva do Catorce, apúntate a esta xornada de voluntariado ambiental enviándonos con antelación os teus datos (nome completo, DNI, data de nacemento e móbil). Así poderemos notificarche cambios de última hora, facerche un seguro de accidentes e facilitarasnos a organización. Na sección Contacto atoparás a información necesaria.

Foto observando anfibiosPunto de encontro: Centro de Saúde de Betanzos.
Data: Domingo, 23 de decembro de 2018.
Hora: Sairemos ás 9:30 e volveremos ás 14:00 horas.

Post data: A elevada participación nesta xornada de voluntariado permitiu acabar con tódolos rebrotes de eucaliptos na zona de bosque da reserva do Catorce. A media mañá, as 20 persoas que participaron xa os tiñan eliminado, polo que ocuparon o resto do tempo nunha visita guiada pola reserva. Ademais de recibiren explicacións sobre as obras realizadas, puideron observa-la reserva repleta de auga e localizar nas pozas as postas e os cabezolos dos anfibios que xa empezaron a reproducirse. O venres día 28 tres voluntarios completaron o traballo eliminando os rebrotes nas paredes da canteira. Con estas actuacións, podemos dar por rematados os traballos de mellora ambiental da reserva.
Foto dos voluntarios


Difundirémo-la custodia en Rábade

19 Novembro 2018

 
A próxima semana, Fragas do Mandeo exporá en Rábade (Lugo) a súa experiencia cunha charla titulada A custodia do territorio como ferramenta para a conservación da biodiversidade da comarca das Mariñas coruñesas.

Será dentro da Xornada sobre custodia do territorio e conservación de espazos naturais protexidos, organizada pola Asociación Galega de Custodia do Territorio, a Deputación de Lugo e a Reserva da Biosfera Terras do Miño. Este encontro busca difundi-la custodia do territorio entre os técnicos, funcionarios e políticos das administracións públicas como un instrumento útil para conservar e xestiona-los espazos naturais protexidos.

Participarán representantes de diversas entidades de custodia e de reservas da biosfera, tanto de Galicia como doutras comunidades autónomas, que mostrarán os beneficios da sinatura de acordos de custodia sobre terreos de alto valor ambiental, así como os trámites administrativos habituais neste tipo de acordos.

Os organizadores consideran que esta xornada pode establecer novas canles de colaboración entre organismos públicos e entidades privadas para mellora-la conservación do patrimonio natural e cultural de Galicia, polo que animan a asistir.

Para obter máis información, descarga o programa.

Data: Martes 27 de novembro, de 10:30 a 14:00 horas.
Lugar: Casa das Insuas, r/ José Pardo 20, Rábade (Lugo).
Inscricións: Por correo electrónico (custodiadoterritorio@gmail.com), teléfono ou WhatsApp (630 948 293).


Nova invasora na Alameda

13 Novembro 2018

 
Antonte fixemos unha visita de inspección á praia da Alameda (Miño), dentro do noso programa de apadriñamento de espazos naturais. O principal obxectivo era revisar a reaparición de especies exóticas invasoras, especialmente dos plumachos (Cortaderia selloana). Segundo se achega o inverno, cada vez é máis doado localizar aqueles exemplares pequenos que aínda nunca floreceron, pois destacan entre a vexetación. Soamente atopamos seis pés, que arrincamos inmediatamente sen dificultade.

Tamén retiramos todo o lixo que atopamos. Pesámolo antes de ciscalo no contedor: 104 quilos. Apareceu principalmente na arribazón traída pola marea, pois a zona dunar segue manténdose bastante limpa. ¡Nótase o traballo continuado!

Pero a sorpresa foi atopar unha nova invasora entre a densa vexetación da trasduna: o carrapatón (Bidens frondosa). A esta especie norteamericana gústanlle os lugares húmidos e ricos en nutrientes. O seu nome alude á capacidade das súas sementes para engancharse con facilidade no pelo dos mamíferos ou nas plumas das aves grazas a un par de pelos dentados; tamén na roupa, o que resulta un encordio. Outra maneira que teñen de dispersarse é flotando na auga. Para que esta planta anual non logre reproducirse hai que arrincala antes de que bote sementes.

Aínda que este ano chegamos algo tarde, hoxe arrincamos tódolos exemplares localizados para evitar que se espallasen as sementes que non tiñan caído. Tamén arrincamos nove chopos híbridos (Populus x canadensis). Pasaron desapercibidos entre os salgueiros e ameneiros da trasduna, pero agora delatounos a intensa cor amarela das súas follas.


A Universidade da Coruña investiga no Mandeo

23 Outubro 2018

 
Hoxe tivemos a primeira reunión de traballo co Dr. José Antonio Cortés Vázquez, do departamento de Socioloxía e Ciencias da Comunicación da Universidade da Coruña, con motivo dun estudo que van realizar no espazo natural protexido ZEC Betanzos-Mandeo.

Logo da Universidade da CoruñaO Grupo de Investigación en Bioloxía Evolutiva desta universidade acaba de inicia-lo proxecto de investigación titulado Desenvolvemento de modelos predictivos da conectividade funcional de poboacións ameazadas en zonas de especial conservación da Rede Natura 2000, co apoio económico da Fundación Biodiversidad.

O obxectivo deste estudo é elaborar unha ferramenta metodolóxica para avaliar os elementos da paisaxe que condicionan o intercambio de exemplares entre as distintas poboacións das especies de particular interese presentes nos espazos protexidos, e asemade predici-las consecuencias que terían aquelas alteracións que conduciran a un maior illamento. Tamén inclúe o deseño de medidas correctoras e o análise dos condicionantes sociais para a súa implantación.

Neste caso vanse tomar como especies a estudar a saramaganta (Chioglossa lusitanica) e a lagartixa da serra (Iberolacerta monticola), pois están confinadas en enclaves moi concretos a causa dun ciclo vital que precisa estritamente de hábitats con determinadas características. O seu futuro está claramente condicionado polas alteracións do seu hábitat, sendo o cambio climático un factor de risco. Pero non basta con dispoñer dunha ferramenta, saber utilizala e onde hai que traballar: tamén se precisa de quen a utilice.

Fragas do Mandeo, como entidade de custodia do territorio activa na ZEC Betanzos-Mandeo, foi escollida como obxecto de estudo na parte de investigación sociolóxica. Esperamos que os resultados fagan reflexionar ós distintos actores que interveñen no territorio e axuden a reduci-los obstáculos que a cotío nos atopamos no noso traballo de conservación da natureza a través da custodia do territorio.


Voluntariado no Catorce o día 21

14 Outubro 2018

 
Nos últimos meses un par de voluntarios estiveron librando de eucaliptos as dúas hectáreas de bosque da reserva de anfibios do Catorce. Por fin, onte acabaron de cortalos.

Pero con iso non se rematou o traballo. Agora hai que amorear por un lado a ramallada e por outro a leña útil, así como seca-los cepos nos que están aparecendo rebrotes. En definitiva, un traballo que pode facer calquera seguindo o ritmo que lle permita o seu estado físico. O prognóstico meteorolóxico é de bo tempo.

Como sempre, o punto de encontro será o Centro de Saúde de Betanzos, onde compartiremos vehículos. Non fai falla que te preocupes das ferramentas, pero é conveniente levar unhas luvas de coiro e vestir roupa axeitada para andar polo monte. Non esquezas algo de picar e de beber para cando fagámo-lo descanso a media mañá.

Se queres participar na des-eucaliptización da reserva de anfibios do Catorce, apúntate a esta xornada de voluntariado ambiental enviándonos con antelación os teus datos (nome completo, DNI, data de nacemento e móbil). Así poderemos notificarche cambios de última hora, facerche un seguro de accidentes e facilitarasnos a organización. Na sección Contacto atoparás a información necesaria.

Punto de encontro: Centro de Saúde de Betanzos.
Data: Domingo, 21 de outubro de 2018.
Hora: Sairemos ás 9:30 e volveremos ás 14:00 horas.

Post data: As trece persoas que participaron nesta xornada de voluntariado remataron co traballo de amorear toda a ramallada e eliminaron boa parte dos pequenos rebrotes que apareceron nos dous últimos meses. Agora soamente queda seguir vixiando a reaparición de rebrotes até verificar que os cepos están totalmente secos e así confirmar que non queda ningún en toda a reserva do Catorce.
Foto dos voluntarios


Uso de cookies: Este sitio web emprega cookies para mellora-la experiencia de usuario. Se continúa navegando consente a aceptación de ditas cookies e acepta a nosa política de cookies (se pincha no enlace obterá máis información).